ვენესუელას დროებითი პრეზიდენტი ხუან გუაიდო ევროკავშირს მოუწოდებს, აშშ-ს მსგავსად, ნიკოლას მადუროს რეჟიმს სანქციები დაუწესოს. ამის შესახებ ხუან გუაიდომ გერმანულ გამოცემა Bild-სთვის მიცემულ ინტერვიუში განაცხადა.
„ახალი სანქციები გვჭირდება ევროკავშირის მხრიდან. გერმანიისა და ევროკავშირის მადლობელი ვართ მხარდაჭერისთვის. ვიმედოვნებთ, რომ ევროკავშირი არა მხოლოდ ულტიმატუმით ემუქრება მადუროს, არამედ შემდგომში ზომებსაც მიიღებს“, - განაცხადა ხუან გუაიდომ.
დროებითი პრეზიდენტის თქმით, ვენესუელაში, შესაძლოა „კიდევ უფრო მეტი ადამიანი დაიღუპოს“.
„აბსოლუტურად ნათელია, რომ რეჟიმი კორუმპირებულია. მადურო დიქტატორია. ბოლო კვირების განმავლობაში საპროტესტო აქციების ფარგლებში 700-ზე მეტი ადამიანი დააკავეს. ციხეებში 300 პოლიტპატიმარი ზის. სიტუაცია შეიარაღებულ ძალებში ისეთია, როგორც მთელ ქვეყანაში - ხალხი შიმშილობს. ჯარისკაცებმა იციან, რომ ასე არ შეიძლება სიტუაცია გაგრძელდეს“, - დასძინა მან.