მაია ცქიტიშვილი - საზოგადოებრივი საპირფარეშოების მოწყობა არის სფერო, სადაც ბიზნესის უფრო აქტიური ჩართულობა არის საჭირო

საზოგადოებრივი საპირფარეშოების მოწყობა არის სფერო, სადაც ბიზნესის უფრო აქტიური ჩართულობა არის საჭირო, - ამის შესახებ ჟურნალისტებს რეგიონული განვითარებისა და ინფრასტრუქტურის მინისტრმა მაია ცქიტიშვილმა განუცხადა. მისივე თქმით, მსოფლიოს სხვადასხვა ქალაქებში და ტურისტულ ცენტრებში ეს არის წმინდა ბიზნესსაქმიანობა.

“რაც შეეხება საზოგადოებრივი საპირფარეშოების მოწყობას, როდესაც ჩვენ პარკინგებზე, ვიზიტორთა ცენტრებზე ვსაუბრობთ, რომლებსაც ჩვენ მრავლად ვაწყობთ, იქ ყოველთვის არის ასეთი საპირფარეშოები. თუ პარკინგი არის გათვლილი თუნდაც რამდენიმე მანქანაზე, იქ არის საპირფარეშო და მცირე მაღაზია. რაც შეეხება საპირფარეშოების ქსელს მთელს ქვეყანაში, სამინისტრო ასეთ პროექტს არ ახორციელებს. ალბათ, ეს არის სფერო, სადაც ბიზნესის უფრო აქტიური ჩართულობა არის საჭირო. მსოფლიოს ტურისტული ცენტრების მაგალითზე შეგვიძლია ვნახოთ, რომ ეს არის წმინდა ბიზნესსაქმიანობა”, - განაცხადა ცქიტიშვილმა.