მოგვწონს ერთმანეთი, თუ არა, ვესალმებით ერთმანეთს თუ არა, გვეხატება გულზე თუ არა, ყველანი ვთანხმდებით, რომ ქვეყანამ უნდა განიცადოს პროგრესი და თავი დააღწიოს ერთპიროვნულ, ოლიგარქიულ მმართველობას, -ამის შესახებ „ერთიანი ნაციონალური მოძრაობის“ ერთ-ერთმა ლიდერმა ნიკა მელიამ ჟურნალისტებს განუცხადა. როგორც მელიამ აღნიშნა, საზოგადოების დაკვეთაა, პროპორციულ საარჩევნო სისტემაზე გადასვლა, ამიტომ 2020 წლისთვის ყველა პოლიტიკური პარტია უნდა გაერთიანდეს და "ქართულ ოცნებას" დაუპირისპირდეს.

„მნიშვნელოვანია პარტიებს შორის მინიმუმ კოორდინირებული საქმიანობა პოლიტიკურ ველზე და შემდეგ არჩევნებზე ფართო კოალიციური ფრონტით დაპირისპირება "ქართულ ოცნებასთან". ასეთ შემთხვევაში გარდაუვალია ბიძინა ივანიშვილის მარცხი. ეს ყველაფერი არა თუ სურვილების დონეზეა, არამედ რეალურად ხორციელდება და დღევანდელი შეხვედრაც ამას ემსახურება. საარჩევნო სისტემის ცვლილება მნიშვნელოვანია. ქვეყანაში არ არსებობს არავინ, გარდა "ქართული ოცნებისა", ვინც ამბობს, რომ მაჟორიტარული სისტემა არის კარგი. "ქართული ოცნებაც" ამბობს, რომ არჩევნები პროპორციული სისტემით უნდა ჩატარდეს, ოღონდ 2024 წელს და არა 2020-ში. ჩვენ ვამბობთ, რომ 2020 წელშივე უნდა ჩატარდეს. ამისთვის ვიწყებთ კამპანიას ქვეყნის მასშტაბით, რომ შევაგროვოთ ხელმოწერები და ვაიძულოთ ხელისუფლება შეცვალოს საარჩევნო სისტემა, რათა არ იყოს ადგილობრივი ფეოდალი-მაჟორიტარები იმ როლში, როდესაც ისინი მოისყიდიან, დააშინებენ და დაჩაგრავენ ხალხს. ამ ყველაფრის გაკეთების შემდეგ, მერწმუნეთ, ვერ ნახავთ ვერც ერთ პოლიტიკურ სუბიექტს, ვინც გამოვა და არ აღიარებს არჩევნებს. მნიშვნელოვანია, გაკეთდეს ის, რისი დაკვეთაც არის საზოგადოებაში",- განაცხადა მელიამ.