რაც შეიძლება მეტი უნდა ვეკონტაქტოთ საქართველოს მოქალაქეებს, მეტი ვიაროთ ხალხში და მეტი დამაჯერებლობით ავუხსნათ მათ, რომ გაერთიანებული ოპოზიცია არ იბრძვის კარიერისთვის, არამედ იბრძვის მოსახლეობის სოციალურ-ეკონომიური მდგომარეობის გაუმჯობესებისთვის, - ამის შესახებ გაერთიანებული ოპოზიციის ერთ-ერთმა ლიდერმა გრიგოლ ვაშაძემ NDI-ს კვლევის შეფასებისას განუცხადა.

როგორც ვაშაძემ აღნიშნა, კვლევამ სერიოზული განსჯის საგანი გაუჩინა პოლიტიკურ სპექტრს.

„გამომდინარე იქიდან, რა ავტორიტეტიც აქვს ამ ორგანიზაციას, მის შედეგებს სრულად ვენდობი. გამომდინარე იქიდან, რა შედეგები აჩვენა ამ კვლევამ, სერიოზული საფიქრალი და სერიოზული განსჯის საგანი მიეცა მთელ პოლიტიკურ სპექტრს. გული დამწყდა, სიმართლე გითხრათ იმაზე, რომ კითხვარში არ იყო გაერთიანებული ოპოზიცია და „ნაციონალური მოძრაობა" იყო შეყვანილი ცალკე. ყველა, ვინც პოლიტიკასთან არის დაკავშირებული გეტყვით, რომ გაერთიანებულმა ოპოზიციამ არა მარტო არნახულ შედეგს მიაღწია ამ არჩევნებში, არამედ დაიწყო სტრუქტურულად გაერთიანება. ჩვენ ვქმნით სრულიად დემოკრატიულ ორგანოებს, რომელიც დემოკრატიულადვე პროცედურულად წაიყვანს გაერთიანებული ოპოზიციის მომავალ საქმიანობას. არავინ იდავებს იმაზე, რომ საქართველოს მოქალაქემ იმედგაცრუება გამოხატა მთლიანად პოლიტიკური სპექტრის მიმართ და ამის წამალი არის ერთადერთი, რაც შეიძლება მეტი ვეკონტაქტოთ საქართველოს მოქალაქეს, მეტი ვიაროთ ხალხში და მეტი დამაჯერებლობით ავუხსნათ მათ, რომ გაერთიანებული ოპოზიცია არ იბრძვის კარიერისთვის, იბრძვის მათი სოციალურ-ეკონომიური მდგომარეობის გაუმჯობესებისთვის“, - განაცხადა ვაშაძემ.