სიღნაღის რაიონულმა სასამართლომ პოლიციელისთვის წინააღმდეგობის გაწევისთვის დაკავებული 3 ახალგაზრდა პატიმრობაში დატოვა. გადაწყვეტილება მოსამართლე მერაბ ღვინიაშვილმა გამოაცხადა. დღევანდელ სხდომაზე დაცვის მხარე გირაოს შეფარდებას ითხოვდა, თუმცა მოსამართლემ ბრალდების მოთხოვნა დააკმაყოფილა.

მხარეებს შორის ინციდენტი 27 იანვარს დედოფლისწყაროში, სოფელ ხორნაბუჯის სტადიონზე მოხდა.

ბრალდების მხარის განცხადებით, ძმები დავით და რობიზონ ყოჩიაშვილები და ირაკლი გლახოშვილი სტადიონზე მყოფების მიმართ აგრესიას გამოხატავდნენ, რის გამოც სამართალდამცავებმა დაშლისა და დამშვიდებისკენ მოუწოდეს, რასაც მათი მხრიდან პოლიციელებზე თავდასხმა მოჰყვა.

ბრალდების საწინააღმდეგო ვერსია აქვთ დაკავებულებს. მათი თქმით, პოლიციელებმა უფლებამოსილებას გადააჭარბეს და ახალგაზრდების მიმართ იძალადეს. დაკავებულები განმარტავენ, რომ პოლიცია მათ მუდმივად დევნის იმის გამო, რომ გლახოშვილი და მისი ძმა წარსულში ყაჩაღობაზე არიან ნასამართლევი.

სასამართლოს გადაწყვეტილებას ადვოკატები გაასაჩივრებენ.