ვენესუელას დროებითი პრეზიდენტი ხუან გუაიდო აცხადებს, რომ ქვეყნის მოსახლეობის 90%-ს ცვლილებები სურს, ხოლო ნიკოლას მადუროს პრაქტიკულად არ დარჩა მომხრეები. ამის შესახებ ხუან გუაიდომ კარაკასში, ვენესუელას ცენტრალურ უნივერსიტეტთან სიტყვით გამოსვლისას განაცხადა.
„როდესაც ქვეყნის მოსახლეობის 90%-ს ცვლილებები სურს, დიქტატორ მადუროს ქედმაღლობა კუთხეში აყენებს და მიმდევრები არ რჩება. უზურპატორის რეჟიმს არ აქვს პასუხი ქვეყანაში არსებულ პრობლემებზე“, - განაცხადა ხუან გუაიდომ.
ვენესუელას დროებითმა პრეზიდენტმა ასევე აღნიშნა, რომ ეჭვი არ ეპარება ქვეყანაში მიმდინარე საპროტესტო აქციების წარმატებაში.
„აბსოლუტურად დარწმუნებული ვარ, რომ ვენესუელაში ცვლილებებს მივაღწევთ“, - განაცხადა გუაიდომ.
მან ასევე ხაზგასმით აღნიშნა, რომ არგენტინის, აშშ-სა და ჩილეს პრეზიდენტები მას მხარს უჭერენ.
„კარგი სატელეფონო საუბარი მქონდა აშშ-ს პრეზიდენტ დონალდ ტრამპთან, ასევე არგენტინისა და ჩილეს პრეზიდენტებთან. მათ სრული მხარდაჭერა გამომიცხადეს. ეს ძალიან მნიშვნელოვანია“, - დასძინა მან.