თუ აქ სიმართლის რაიმე ნიშანწყალი მაინც არის, ცხადია, რომ ეს აბსოლუტურად არანორმალური და უკიდურესად აღმაშფოთებელია, - ამის შესახებ საპარლამენტო უმრავლესობის წევრმა გია ჟორჟოლიანმა პირადი ცხოვრების ამსახველი ფარული ჩანაწერების გავრცელებასთან დაკავშირებით განაცხადა.
მისი თქმით, საზოგადოებაში შეუწყნარებელი დამოკიდებულება უნდა იყოს მსგავსი ფაქტების მიმართ.
"კონკრეტულად ამის შესახებ ჯერჯერობით ცოტაა ცნობილი, მაგრამ თუ აქ რაიმე სიმართლის ნიშანწყალი მაინც არის, ცხადია, რომ ეს აბსოლუტურად არანორმალური და უკიდურესად აღმაშფოთებელია. სრულად, ზედმიწევნით, დეტალურად უნდა იქნას გამოძიებული და უნდა დაისაჯოს ის ხალხი, თუ ასეთი რამ განხორციელდა. მეორე - საზოგადოებაში აბსოლუტურად შეუწყნარებელი დამოკიდებულება უნდა იყოს ამის მიმართ, ხოლო ის თუ საიდან განხორციელდა, ეს გამოძიებამ უნდა დაადგინოს," - განაცხადა ჟორჟოლიანმა.