ქეთევან წამებულის გამზირზე, სადაც 7 ადამიანი გარდაცვლილი იპოვეს, თბილისის მერი კახა კალაძე მივიდა.

ის ამ წუთებში ადგილზე არსებულ ვითარებას ეცნობა. ადგილზე იმყოფება ასევე მერის მოადგილე სოფიო ხუნწარია.

ადგილზე მუშაობენ საპატრულო პოლიციის წარმომადგენლები და ექსპერტ-კრიმინალისტები, მიმდინარეობს საგამოძიებო მოქმედებები, რომლის დასრულების შემდეგ გარდაცვლილთა ცხედრებს პროზექტურაში გადაასვენებენ.

ქეთევან წამებულის გამზირზე #67-ში სავარაუდოდ, მხუთავი აირის CO-ს გაჟონვის შედეგად 7 ადამიანი გარდაიცვალა.

გავრცელებული ინფორმაციით, ყველა მათგანი ნაქირავებ ბინაში ცხოვრობდა. შსს-ს ინფორმაციით, მომხდარზე გამოძიება დაიწყო სსკ-ის 240-ე მუხლის მესამე ნაწილით, რაც გულისხმობს ელექტრო, ან თბოენერგიის, გაზის, ნავთობის, ან ნავთობპროდუქტების უსაფრთხოების წესების დარღვევას, რასაც მოყვა 2, ან მეტი ადამიანის სიცოცხლის მოსპობა.