ეს ამბავი მოსკოვის დღის წესრიგის ნაწილია და წლებია უკვე ცხინვალის მარიონეტული რეჟიმი ახმაურებს, - ამის შესახებ საქართველოს პარლამენტის ვიცე-სპიკერმა და „ევროპული საქართველოს“ წევრმა სერგი კაპანაძემ ე.წ. სამხრეთ ოსეთის დე ფაქტო საგარეო საქმეთა მინისტრის განცხადების შეფასებისას განაცხადა.
„ამ საუბრებს საქართველოს ხელისუფლების წარმომადგენლებმაც შეუწყეს ხელი, როდესაც საუბარი დაიწყეს რაღაც რუკებზე, რომელიც თითქოს ცხინვალის რეჟიმს გააჩნია. ამ რუკებს არანაირი ლეგიტიმაცია არ აქვს. მათზე თითქოს ე.წ. სამხრეთი ოსეთის საზღვრებია ასახული.
ეს ჩვენს საერთაშორისო პარტნიორებთან მთავარი მოლაპარაკების საგანი უნდა იყოს. იქნება ეს ჟენევის ფორმატი თუ რომელიმე სხვა, ჩვენი გზავნილი ნათელი უნდა იყოს და გასაგები რუსეთის ხელისუფლებისთვის“, - განაცხადა სერგი კაპანაძემ.
შეგახსენებთ, რომ გერმანულ გამოცემა Neues Deutschland-სთვის მიცემულ ინტერვიუში ე.წ. სამხრეთ ოსეთის დე ფაქტო საგარეო საქმეთა მინისტრმა მედოევმა განაცხადა, რომ „ისტორიული აღმოსავლეთ ოსეთი (თრუსო, კობი და გუდოს ხეობა) საქართველოს კონტროლის ქვეშაა და ეს პრობლემა ყოველ წელს უფრო რთულდება“.