ეკა ბესელია - ჩემი პრინციპული პოზიციაა, რომ იმ ადამიანებთან ერთად, რომლებიც თავად ანგრევენ სასამართლო სისტემას, კრიტერიუმების დაწერა არ შეიძლება

ჩემი პრინციპული პოზიციაა, რომ იმ ადამიანებთან ერთად, რომლებიც სასამართლოში თავად ანგრევენ სასამართლო სისტემას, კრიტერიუმების დაწერა არ შეიძლება - ისინი პროცესს უნდა დაემშვიდობონ, არ ვაპირებ მათთან ერთად არანაირ კრიტერიუმებზე მსჯელობას, - ამის შესახებ ჟურნალისტებს დეპუტატმა ეკა ბესელიამ განუცხადა.

დეპუტატმა ხაზგასმით აღნიშნა, რომ უზენაესი სასამართლოს მოსამართლეთა შერჩევის პროცესზე პარლამენტმა უნდა იმუშაოს და ყველა მხარე პარლამენტის გადაწყვეტილებას დაელოდოს.

“ვისაც ვუპირისპირდები, ეს ის ჯგუფია, რომელიც სასამართლოში თავად ანგრევს სასამართლოს დამოუკიდებლობას და სასამართლოს სისტემას. ახლა გადაწყვიტეს თვითონ დაწერონ უზენესი სასამართლოს მოსამართლეთა შერჩევის კრიტერიუმები. პირველ რიგში, ეს ანომალური ვითარება უნდა შეიცვალოს. არ შეიძლება რეფორმაზე მომუშავე ჯგუფი საკუთარი ინტერესებისათვის მიმართულ პროექტზე სამუშაო ჯგუფად გადაიქცეს. ჩემი პრინციპული პოზიციაა, რომ ამ ადამიანებთან ერთად კრიტერიუმების დაწერა არ შეიძლება. ისინი ამ პროცესს უნდა დაემშვიდობონ. არ ვაპირებ მათთან ერთად არანაირ კრიტერიუმებზე მსჯელობას“, - განუცხადა ჟურნალისტებს ეკა ბესელიამ. მისივე თქმით, ამ იდეას მისი რამდენიმე კოლეგა იზიარებს და აღნიშნულ საკითხზე გუნდში მსჯელობა გაიმართება.