საგარეო ურთიერთობათა კომიტეტის თავმჯდომარე სოფიო ქაცარავა ნატო-ს სამეკავშირეო ოფისის ხელმძღვანელს, როზარია პულიზის შეხვდა. ამის შესახებ „ინტერპრესნიუსს“ პარლამენტის პრესსამსახურიდან აცნობეს.

მათი ინფორმაციით, მხარეებმა ნატო-საქართველოს შორის არსებული მჭიდრო ურთიერთობები და თანამშრომლობის მზარდი დინამიკა განიხილეს, რომლის შენარჩუნება და გაძლიერება მნიშვნელოვანია ორივე მხარისთვის.

შეხვედრაზე ასევე ისაუბრეს 2019 წელს დაგეგმილ მაღალი დონის ღონისძიებებზე. „მიმდინარე წელი განსაკუთრებით დატვირთული იქნება ნატო-საქართველოს ურთიერთობების მხრივ, რაც ქვეყნისთვის ძალიან მნიშვნელოვანია. ეს კიდევ ერთხელ უსვამს ხაზს იმ ფაქტს, რომ ალიანსი მტკიცედ უჭერს მხარს საქართველოს ნატოში ინტეგრაციას“, - განაცხადა სოფიო ქაცარავამ.