პრეზიდენტის ადმინისტრაციის უფროსის მოადგილის ქეთი მახარაშვილის განცხადებით, პრეზიდენტისა და არასამთავრობოების შეხვედრის მთავარი თემა დეზინფორმაციის პრევენციას შეეხება. როგორც მან შეხვედრის დაწყებამდე აღნიშნა, დღევანდელ შეხვედრაზე ამ მიმართულებით არსებული პრობლემები უნდა გამოიკვეთოს.

„დღევანდელი შეხვედრა ტარდება საქართველოს პრეზიდენტის ინიციატივით და ამ შეხვედრის მთავარი თემა არის ცრუ ინფორმაციის, დეზინფორმაციის პრევენციისა და რეგულირების საკითხების განხილვა საზოგადოებრივ ორგანიზაციებთან, რადგან ჩვენ ვხედავთ, რომ პრობლემა არის და ეს პრობლემა არამარტო საქართველოშია, არამედ, ბრიუსელში საქართველოს პრეზიდენტის ვიზიტის დროს ამ საკითხზე ევროკავშირისა და ნატო-ს წარმომადგენლებმაც ისაუბრეს. ჩვენ გვინდა, რომ პირველ რიგში, საზოგადოებრივ ორგანიზაციებთან დავიწყოთ საუბარი ამ თემაზე, გამოვკვეთოთ, რა პრობლემებია, ჩვემი საზოგადოება როგორ ხედავს ამ პრობლემებსა და მათი გადაჭრის მექანიზმებს. შესაბამისად, ჩვენ გავაგრძელებთ ამ თემაზე მუშაობას უკვე ალბათ, სამუშაო ჯგუფის ფარგლებში, რომ კონკრეტულ რეკომენდაციებამდე მივიდეთ, რომლებიც შემდგომ უკვე საქართველოს პრეზიდენტის მიერ იქნება საკანონმდებლო ორგანოსთან და მთავრობასთან წარგენილი. შესაბამისად, ერთობლივად ვიმუშავებთ ამ კონკრეტული პრობლემების გადასაჭრელად”,- განაცხადა მახარაშვილმა.

მისივე თქმით, საქართველოს პრეზიდენტის მიზანი არ არის, რომ სიტყვისა და გამოხატვის თავისუფლებას საფრთხე შეექმნას.

“ჩვენი მხრიდან არანაირი ინიციატივა ჯერჯერობით არ არსებობს, არც ფურცელზე დაწერილი, ჯერ დავიწყეთ მუშაობა და ვიკვლევთ ამ საკითხზე როგორ მუშაობენ სხვადასხვა ქვეყნები და მთავრობები“, - აღნიშნა მხარაშვილმა.