ფარული ჩანაწერების გამავრცელებლების გარდა, გამოძიება უნდა გავიდეს იმ ადამიანების კვალზე, ვინც ეს სცენარი დაგეგმა, წაახალისა თუ ბიძგი მისცა, - ამის შესახებ არასამთავრობო ორგანიზაცია "ადამიანის უფლებების სწავლებისა და მონიტორინგის ცენტრის" წარმომადგენელმა სოფო ვერძეულმა ჟურნალისტებს პირადი ცხოვრების ამსახველი ფარული ჩანაწერების გავრცელების საქმეზე დასმული კითხვის საპასუხოდ განუცხადა.
მისივე შეფასებით, ეს საქმე შინაგან საქმეთა სამინისტროსთვის არის ძალიან დიდი გამოწვევა და საზომი სამინისტროს მუშაობის მიმართულებით.
„კარგია, რომ გამოძიების დაწყებიდან რამდენიმე დღეში არის კონკრეტული შედეგი, თუმცა, არ ვარ დარწმუნებული, რომ ეს არის სრულად ის ჯგუფი, რომელიც პასუხისმგებელია იმ მძიმე დანაშაულზე, რასაც ადგილი ჰქონდა. ამიტომ გამავრცელებლების გარდა, გამოძიება უნდა გავიდეს იმ ადამიანების კვალზე, ვინც ეს სცენარი დაგეგმა, წაახალისა თუ ბიძგი მისცა ამ ინიციატივას და მხარი დაუჭირა ამ დანაშაულებრივ ქმედებას. საზოგადოებამ უნდა იცოდეს, რომ ნებისმიერი პირადი ცხოვრების ამსახველი ჩანაწერის შენახვა თუ სხვისთვის გაზიარება არის დასჯადი და უნდა იცოდეს, როგორც სამართლებრივად, ასევე მორალურად უმძიმესი კატეგორიის დანაშაულია. ამიტომ ველოდებით დამატებით რეაგირებას შინაგან საქმეთა სამინისტროსგან. კარგია, რომ რეაგირების გარკვეული ეტაპი უკვე ვნახეთ, გარკვეული შედეგები არის, თუმცა მთავარი კითხვა საზოგადოების არის -ვინ დგას ამის უკან და რამდენად არის იმის რესურსი, შემკვეთებამდე და ორგანიზატორებამდე მივიდეს შინაგან საქმეთა სამინისტრო. ეს იქნება მნიშვნელოვანი საზომი მათ შორის შინაგან საქმეთა სამინისტროს მუშაობის",- განაცხადა ვერძეულმა.