საქართველოს საგარეო საქმეთა მინისტრი დავით ზალკალიანი ვაშინგტონში გაემგზავრა, სადაც სახელმწიფო მდივნის მაიკ პომპეოს მიწვევით „ისლამური სახელწიფოს“ წინააღმდეგ ბრძოლის გლობალური კოალიციის საგარეო საქმეთა მინისტრების შეხვედრაში მონაწილეობს.

როგორც „ინტერპრესნიუსს“ საგარეო საქმეთა სამინისტროდან აცნობეს, აშშ-ში ვიზიტის ფარგლებში დავით ზალკალიანი შეხვედრებს გამართავს სახელმწიფო დეპარტამენტში, თეთრი სახლის წარმომადგენლებთან, ასევე აშშ-ის კონგრესში. ვიზიტის ფარგლებში დავით ზალკალიანი ასევე შეხვდება აშშ-ის ექსპერტული და ანალიტიკური წრეების წარმომადგენლებს, შეხვედრა გაიმართება ათასწლეულის გამოწვევის კორპორაციაში.

ვიზიტის ფარგლებში საგარეო საქმეთა მინისტრი აშშ-ში საქართველოს საელჩოში შეხვედრას გამართავს შეერთებულ შტატებში მცხოვრები ქართული დიასპორის წარმომადგენლებთან.