„ნაციონალურმა მოძრაობამ“ პარლამენტს თემირლან მაჩალიკაშვილის მკვლელობასთან დაკავშირებული დროებითი საგამოძიებო კომისიის შექმნის თაობაზე დადგენილების პროექტი წარუდგინა
საპარლამენტო ფრაქცია „ნაციონალურმა მოძრაობამ“ საქართველოს პარლამენტს განსახილველად წარუდგინა დადგენილების პროექტი დროებითი საგამოძიებო კომისიის შექმნის თაობაზე, რომელმაც უნდა შეისწავლოს 2017 წლის 26 დეკემბერს პანკისის ხეობაში ჩატარებული სპეცოპერაციის შედეგად თემირლან მაჩალიკაშვილის მკვლელობის ფაქტთან დაკავშირებული გარემოებები. ამის შესახებ „ინტერპრესნიუსს“ ფრაქციიდან აცნობეს.
როგორც „ნაციონალური მოძრაობის“ მიერ გავრცელებულ პრესრელიზშია ნათქვამი, აღნიშნული ფაქტისას იკვეთება სახელმწიფო ორგანოს, თანამდებობის პირების კანონსაწინააღმდეგო ქმედებები, რის შედეგადაც მოხდა თემირლან მაჩალიკაშვილის სიცოცხლის ხელყოფა.
ფრაქციის მიერ გავრცელებულ ინფორმაციაში ასევე აღნიშნულია, რომ განსაკუთრებით მნიშვნელოვანია ის, თუ ვის მიერ გაიცა ბრძანება და რის საფუძველზე, ჰქონდათ თუ არა უტყუარი მტკიცებულებები საგამოძიებო ორგანოებს და არსებობდა თუ არა საფუძვლიანი ეჭვი, რომლის შედეგადაც განხორციელდა პირის ლიკვიდაცია. „ნაციონალური მოძრაობა“ ასევე ხაზს უსვამს, რომ მთელი ამ პერიოდის განმავლობაში დაზარალებულებს აქვთ საფუძვლიანი კითხვები და უნდობლობა გამოძიების მიმართ, რომელსაც დღემდე არ მოუხდენია სათანადო სამართლებრივი რეაგირება.
