დავით მათიკაშვილი - პირველი მიზანი არის, რომ დადგინდეს და დაისაჯოს ფარული ჩანაწერების შემკვეთიც და ჩამდენიც

პირველი მიზანი არის, რომ დადგინდეს და დაისაჯოს ფარული ჩანაწერების შემკვეთიც და ჩამდენიც, - ამის შესახებ იურიდიულ საკითხთა კომიტეტის თავმჯდომარის მოვალეობის შემსრულებელმა დავით მათიკაშვილმა ბიუროს სხდომაზე განაცხადა.

საპარლამენტო უმრავლესობის დეპუტატის თქმით, მზადაა ჩაერთოს დისკუსიაში, რათა მოხდეს სანქციების გაზრდა მსგავსი ტიპის დანაშაულზე. „ჩვენ ორი დღის წინ დავგმეთ ეს საზიზღარი ქმედება. ეს ის ბოტორებაა, რომელიც უნდა დამარცხდეს საქართველოში. ჩვენ ამავდროულად მზად ვართ ვიმსჯელოთ იმაზე, რომ თუ სანქციის გაზრდა ან რამე ტიპის ღონისძიება ხელს შეუწყობს პრევენციულად ამგვარი დანაშაულის არიდებას, გაიზარდოს სანქცია.

მე მესმის, რომ პირდაპირ კორელაციაში შეიძლება არ მოვიდეს სანქციის გაზრდა, მაგრამ გარკვეულწილად თუ ჩავთვლით, რომ სანქცია არის დაბალი, ამაზეც შეგვიძლია გავხსნათ დისკუსიის კარი. პირველი მიზანი კი არის, რომ დადგინდეს და დაისაჯოს ამ დანაშაულის შემკვეთიც და ჩამდენიც“, - განაცხადა დავით მათიკაშვილმა.