ეკონომიკის და მდგრადი განვითარების მინისტრმა გიორგი ქობულიამ ტურიზმის ადმინისტრაციის ახალი ხელმძღვანელი, მარიამ ქვრივიშვილი ადმინისტრაციის თანამშრომლებს წარუდგინა.
როგორც გიორგი ქობულიამ განაცხადა, მარიამ ქვრივიშვილი ტურიზმის ადმინისტრაციას ახალ ენერგიას შესძენს.
„მარიამმა ორი წელი გაატარა, როგორც ტურიზმის სააგენტოს ხელმძღვანელის მოადგილემ. ამის შემდეგ ის იმყოფებოდა კერძო სექტორში. მარიამ ქვრივიშვილს აქვს ორი უმაღლესი განათლება მიღებული ბიზნესის სფეროში. მგონია, რომ მისი გამოცდილება და ის ხედვები, რომელიც მან გაგვიზიარა, კიდევ უფრო მეტ და ახალ ენერგიას შესძენს ტურიზმის სააგენტოს,- განაცხადა ქობულიამ.
თავის მხრივ, მარიამ ქვრივიშვილმა იმედი გამოთქვა, რომ მისი საქმიანობა წარმატებული იქნება.
„დიდი პატივია, რომ მომეცა საშუალება გავხდე ქვეყნის ერთ-ერთი სტრატეგიული მიმართულების ხელმძღვანელი და შევძლო უდიდესი წვლილი შევიტანო ჩვენი ქვეყნის განვითარებაში. გამოწვევები ბევრია. მნიშვნელოვანია, რომ მოკლე, საშუალო და გრძელვადიანი სტრატეგიებით შევძლოთ და განვავითაროთ ახალი ტურისტული პროდუქტები",- განაცხადა ქვრივიშვილმა.