საქართველოს პროექტის „Global Forest Watch” (GFW) ეროვნულ მრჩეველთა საბჭოს შეხვედრა გაიმართა

საქართველოს პროექტის “ Global Forest Watch” (GFW) ეროვნულ მრჩეველთა საბჭოს რიგით მეექვსე შეხვედრა გაიმართა, სადაც პროექტის ფარგლებში განხორციელებული ქმედებები შეაჯამეს. როგორც „ინტერპრესნიუსს“ გარემოს დაცვისა და სოფლის მეურნეობის სამინისტროდან აცნობეს, პროექტის მიხედვით, საქართველოში ტყისა და მიწათსარგებლობის ატლასი იქმნება, რომლის მეშვეობით დაინტერესებული მხარეებისთვის, სატყეო სექტორის შესახებ ინფორმაცია საჯაროდ იქნება ხელმისაწვდომი.

შეხვედრაზე გარემოს დაცვისა და სოფლის მეურნეობის მინისტრის მოადგილემ იური ნოზაძემ, საქართველოში ტყისა და მიწათსარგებლობის ატლასის მნიშვნელობას გაუსვა ხაზი.

სამინისტროს ცნობით, შეხვედრას სატყეო დარგში მომუშავე სამთავრობო და გარემოსდაცვითი არასამთავრობო ორგანიზაციების წარმომადგენლები ესწრებოდნენ, სადაც ინტერნეტ ტექნოლოგიაზე დაფუძნებული „ტყისა და მიწათსარგებლობის ატლასის/პორტალის“ შემუშავების პროცესზე, მიმდინარე და დაგეგმილი ღონისძიებებზე იმსჯელეს.