აკაკი ბობოხიძე უმრავლესობას - რეგიონების განვითარება პირველ რიგში თბილისისთვის იყო შანსი და პარლამენტის ქუთაისიდან გადმოტანით, ეს იდეა მოკალით

რეგიონების განვითარება იყო პირველ რიგში თბილისისთვის შანსი და თქვენ პარლამენტის ქუთაისიდან თბილისში გადმოტანით, მოკალით ეს იდეა, - ამის შესახებ „ერთიანი ნაციონალური მოძრაობის“ დეპუტატმა აკაკი ბობოხიძემ საგაზაფხულო სესიის პირველ პლენარულ სხდომაზე განაცხადა.

აკაკი ბობოხიძე პარლამენტის ქუთაისიდან თბილისში გადმონაცვლებას გამოეხმაურა.

„არაფერს ვიტყვი იმაზე, რომ თქვენი ქუთაისის მაჟორიტარის მთავარი დაპირება იყო ის, რომ პარლამენტი ქუთაისიდან არ გადავიდოდა. ეს ისე, როგორც უამრავი სხვა დაპირება, აღმოჩნდა მორიგი ტყუილი. თუმცა, ეს არ არის გასაკვირი.

მე მაინც ვიტყვი თუ რა პრობლემის მოგვარებას უშლით ხელს. თბილისის განვითარება იქცა თბილისისთვის პრობლემად, აქ დამკვიდრებული ადამიანებისთვის თბილისში ცხოვრება არის პრაქტიკულად შეუძლებელი. ის, რომ თბილისი არის „თავკომბალა“, ცნობილია, ნებისმიერი ურბანისტი გეტყვით, რომ თუ 30 პროცენტს აჭარბებს ერთი ქალაქის მოსახლეობა, მაშინ იმ სახელმწიფოს უკვე პრობლემები აქვს. თბილისი სამწუხაროდ, ლამის 50 პროცენტზე ავიდა აქ მცხოვრებთა ოდენობის მიხედვით.

რეგიონების განვითარება იყო პირველ რიგში თბილისისთვის შანსი და თქვენ ამ გადაწყვეტილებით, პოლიტიკური ანგარიშსწორების და თქვენი კომფორტის სასარგებლოდ 2012 წელსვე მოკალით ეს იდეა“, - განაცხადა აკაკი ბობოხიძემ.