პირადი ცხოვრების ამსახველ კადრებთან დაკავშირებით ყველას აქვს შენიშვნის თუ კრიტიკის უფლება, გარდა „ნაციონალური მოძრაობის“ და „ევროპული საქართველოსი“, - ამის შესახებ „ქართული ოცნების“ დეპუტატმა დიმიტრი ხუნდაძემ საგაზაფხულო სესიის პირველ პლენარულ სხდომაზე განაცხადა.

როგორც ხუნდაძემ აღნიშნა, სწორედ ეს ორი პარტია იყო შემოქმედი იმ წარსულისა, რომელიც დღესაც ქმნის რთულ რეალობას.

„მინდა გამოვეხმაურო ჩემი ოპონენტების მიერ პირადი ცხოვრების ამსახველ კადრებთან დაკავშირებით გაკეთებულ ხმამაღალ განცხადებებს. მე ვფიქრობ, ამ თემასთან დაკავშირებით ყველას აქვს შენიშვნის თუ კრიტიკის უფლება, გარდა „ნაციონალური მოძრაობისა“, ეს იქნება „ნაცები“, ევრონაცები“, ზეციური თუ მიწიერი „ნაცები“, ამას არ აქვს მნიშვნელობა. მათი შემოქმედება ერთი იყო და სწორედ ეს შემოქმედება და უახლოესი წარსული დღესაც ქმნის მძიმე რეალობას“, - განაცხადა დიმიტრი ხუნდაძემ.