პრემიერ-მინისტრი ინტერპელაციის წესით პარლამენტში ფრაქცია “ნაციონალურმა მოძრაობამ“ დაიბარა. როგორც “ინტერპრესნიუსს“ ფრაქცია „ნაციონალური მოძრაობის“ თავმჯდომარემ რომან გოცირიძემ განუცხადა, ფრაქციამ მამუკა ბახტაძე კრიმინოგენული ვითარების საკითხთან დაკავშირებით დაიბარა და მისგან ელის პასუხს კითხვაზე, თუ რამ გამოიწვია ქვეყანაში კრიმინოგენული ვითარების მკვეთრი ზრდა.

პარლამენტის პლენარულ სხდომაზე ირაკლი კობახიძემ დაადასტურა, რომ პრემიერ- მინისტრის პარლამენტში ინტერპელაციის წესით 22 მარტს მივა.

ინტერპელაცია საპარლამენტო კონტროლის ახალ მექანიზმს წარმოადგენს. კონსტიტუციისა და რეგლამენტის მიხედვით, ფრაქცია უფლებამოსილია საქართველოს მთავრობას და პარლამენტის წინაშე ანგარიშვალდებულ ორგანოებს მიმართოს კონკრეტული შეკითხვით. შეკითხვის ადრესტი კი, ვალდებულია შეკითხვას პირადად უპასუხოს პარლამენტის პლენარულ სხდომაზე, აგრეთვე შეკითხვაზე პასუხი წერილობითი ფორმით წარუდგინოს პლენარულ სხდომას.

რეგლამენტის თანახმად, ინტერპელაციის წესით შეკითხვის ადრესატი პარლამენტში წარდგება წელიწადში ოთხჯერ - საგაზაფხულო სესიის მარტისა და მაისის და საშემოდგომო სესიის - სექტემბრისა და ნოემბრის პლენარული სხდომების ბოლო კვირის პარასკევს.