თამარაშვილის ქუჩაზე დაჭრილი ორი მამაკაციდან ერთს ამ წუთებში ოპერაცია უტარდება. ამის შესახებ „ინტერპრესნიუსს“ რესპუბლიკურ საავადმყოფოში განუცხადეს.
კლინიკაში აღნიშნავენ, რომ ერთ-ერთი დაჭრილი შუახნის მამაკაცია. სავარაუდოდ, ოპერაციული ჩარევა მეორე მამაკაცსაც დასჭირდება. რა სახის დაზიანებები მიიღეს დაჭრილებმა ან რამდენი ცეცხლნასროლი ჭრილობა აღენიშნებათ, კლინიკაში არ აკონკრეტებენ.
თამარაშვილის ქუჩაზე ორი მამაკაცის დაჭრის ფაქტზე შსს-მ გამოძიება დაიწყო. როგორც „ინტერპრესნიუსს“ უწყებაში განუცხადეს, თამარაშვილის ქუჩაზე მომხდარ დაჭრის ფაქტთან დაკავშირებით გამოძიება სისხლის სამართლის კოდექსის 19-109-ე და 236-ე მუხლებით დაიწყო, რაც დამამძიმებელ გარემოებებში განზრახ მკვლელობის მცდელობას და ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.
თვითმხილველების ინფორმაციით, თამარაშვილის ქუჩაზე მომხდარ გასროლას სიტყვიერი დაპირისპირება უძღოდა წინ. მათივე ინფორმაციით, მათ 5 გასროლის ხმა გაიგეს.
შემთხვევის შედეგად სხეულის დაზიანება მიიღო ორმა ადამიანმა. ორივე მათგანი რესპუბლიკურ საავადმყოფოშია გადაყვანილი. ფაქტთან დაკავშირებით სამართალდამცველები საგამოძიებო მოქმედებებს ატარებენ.