პარლამენტის პლენარულ სხდომას, სადაც განათლებისა და მეცნიერების მინისტრ მიხეილ ბატიაშვილს მოუსმენენ, ზუგდიდის მე-6 საჯარო სკოლის გარდაცვლილი დირექტორის ია კერზაიას შვილი ბაჩანა შენგელია დაესწრება.

ბაჩანა შენგელია ასევე მონაწილეობას მიიღებს საკომიტეტო სხდომაში, სადაც განხილვის მთავარი თემა სწორედ ია კერზაიასთან დაკავშირებული საქმე იქნება.

როგორც ბაჩანა შენგელიამ ჟურნალისტებს სესიის დაწყების წინ განუცხადა, არსებობს უამრავი მტკიცებულება, რაც მხოლოდ იმას ადასტურებს, რომ კერზაიას მიმართ ადგილი ჰქონდა პოლიტიკურ დევნას და იმას, რაც ზუგდიდის მე-6 საჯარო სკოლაში მოხდა, ინსპექტირებასთან საერთო არაფერი აქვს.

„ეს იყო ადამიანის გამიზნული პოლიტიკური დევნა, რასაც მისი გარდაცვალება მოჰყვა. საქმეშია გამოგონილი სარჩელის ავტორი, რომელიც ბუნებაში არ არსებობს. არის სხვა საეჭვო ვითარება, საქმეში ჩართული იყო ზუგდიდის ადგილობრივი რესურსცენტრი, რომელიც პირდაპირ ახორციელებდა ზეწოლას და ინსპექტირების სამსახურს ეხმარებოდა, რომ საქმე ბოლომდე მიეყვანა და დასკვნა ყოფილიყო რაც შეიძლება ხისტი“, - განუცხადა ჟურნალისტებს ბაჩანა შენგელიამ.

შეგახსენებთ, ზუგდიდის მეექვსე სკოლის დირექტორი ია კერზაია 9 დეკემბერს გარდაიცვალა. კერზაიას შვილი ბაჩანა შენგელია დედის ჯანმრთელობის მდგომარეობის გაუარესებას მასზე განხორციელებულ პოლიტიკურ ზეწოლას უკავშირებდა, რომელსაც, მისი მტკიცებით, ია კერზაია განიცდიდა. კერძოდ, ბაჩანა შენგელია, სკოლაში აუდიტის სამსახური შესვლას პედაგოგზე ზეწოლად აფასებდა.