„ნაცმოძრაობა“ - ჩვენს ვებ-გვერდზე კიბერშეტევა მოხდა, საფუძვლიანი ეჭვი გვაქვს, რომ ეს ხელისუფლებასთან დაახლოებული ჯგუფების მიერ განხორციელდა
„ერთიანი ნაციონალური მოძრაობის“ ინფორმაციით, მათი ვებ-გვერდის მობილურ ვერსიაზე კიბერშეტევა განხორციელდა.
როგორც „ინტერპრესნიუსს“ პარტიიდან აცნობეს, ეს არ არის პირველი შემთხვევა, როდესაც პარტიის ერთ-ერთ მთავარ საინფორმაციო საშუალებაზე ჰაკერულ თავდასხმას აქვს ადგილი.
მათივე ინფორმაციით, მსგავსი ქმედებები განსაკურებით ინტენსიური ხდება საარჩევნო პერიოდში.
„ვებ-გვერდის მეშვეობით მთავარი ოპოზიციური პარტია აქტიურად აწვდის მოსახლეობას ინფორმაციას ქვეყნაში არსებულ მძიმე მდგომარეობის, აგრეთვე კვალიფიციურ შეთავაზებებს აუცილებელი ცვლილებების და რეფორმების დაკავშირებით. აქედან გამომდინარე, გვაქვს საფუძვლიანი ეჭვი, რომ ეს მოქმედება განხორციელდა ხელისუფლებასთან დაახლოებული ჯგუფების მიერ.
გვსურს განვაცხადოთ, რომ მსგავსი მეთოდებით ბრძოლა ვერ შეაჩერებს „ქართული ოცნების“ პოლიტიკურ დასასრულს და კიდევ ერთხელ ააშკარავებს ხელისუფლების ჭეშმარიტ სახეს“, - აღნიშნულია ინფორმაციაში.
