ქეთი მურუსიძე თავის დანაშაულს, თაღლითობის ნაწილში დაკავების დღიდან აღიარებს და მანამდეც აღიარებდა, - განაცხადა ჟურნალისტებთან საუბრისას კლუბებში ჩატარებული სპეცოპერაციისას ერთ-ერთი დაკავებულის, ქეთი მურუსიძის დედამ, თეონა ტყაბლაძემ.

მისი განმარტებით, საკონტროლო შესყიდვისას ამოღებულ ნარკოტიკზე ქეთი მურუსიძის დნმ არ ამოსულა. "ბევრი მტკიცებულება არის იმისა, რომ მას ნარკოტიკების რეალიზებაში მონაწილეობა არ მიუღია. მან მოცილების მიზნით აგენტ-პროვოკატორს გაციების წამალი, "ფლუკოლდი" მისცა. ნივთმტკიცება ნარკოტიკით აგენტ-პროვოკატორმა შეცვალა თუ არა, არ ვიცი. საკონტროლო შესყიდვისას ამოღებულ ნარკოტიკზე, რომელიც აგენტ-პროვიკატორმა პროკურატურას მიაწოდა,

ექსპერტიზის შედეგად, ქეთის დნმ არ ამოვიდა, რაც ნიშნავს იმას, რომ ქეთის ამ ნაწილში ბრალი არ მიუძღვის. ძალიან დიდი იმედი მაქვს სასამართლოსი", - განაცხადა ტყაბლაძემ.