ევროკავშირის ლიდერთა შეხვედრამ დიდი ბრიტანეთის პრემიერმინისტრ ტერეზა მეისთან მნიშვნელოვანი შედეგები ვერ მოიტანა. ამის შესახებ „ტვიტერის“ პირად გვერდზე ევროპული საბჭოს პრეზიდენტმა დონალდ ტუსკმა დაწერა.

„პრემიერმინისტრ ტერეზა მეისთან შეხვედრა გაიმართა იმის შესახებ, თუ როგორ გამოვიდეთ ჩიხიდან „ბრექსითთან“ დაკავშირებით. ამ დრომდე არავითარი გარღვევა არ ჩანს. მოლაპარაკებები გრძელდება“, - წერს ტუსკი.

ტერეზა მეიმ ბრიუსელში გამართული შეხვედრების შემდეგ განაცხადა, რომ დაგეგმილ ვადებში აპირებს უზრუნველყოს თავისი ქვეყნის ევროკავშირიდან გამოყვანა. ერთობლივ ოფიციალურ განცხადებაში მოლაპარაკებების შედეგებთან დაკავშირებით აღნიშნულია, რომ ევროკავშირი და დიდი ბრიტანეთი განაგრძობენ მოლაპარაკებებს შექმნილი ჩიხური მდგომარეობის გადასაწყვეტად.