ეს არის ნამდვილად უპირობო და მტკიცე მხარდაჭერის გამოხატვა, - ასე შეაფასა პარლამენტის პლენარული სხდომის დაწყებამდე უმრავლესობის წევრმა, საგარეო ურთიერთობათა კომიტეტის თავმჯდომარე სოფო ქაცარავამ აშშ-ის კონგრესისადმი წარდგენილი რეზოლუცია.
„ეს არის ნამდვილად უპირობო და მტკიცე მხარდაჭერის გამოხატვა საქართველოს სუვერენიტეტისა და ტერიტორიული მთლიანობის მიმართ ჩვენი მთავარი სტრატეგიული პარტნიორის მხრიდან, იმ მოვლენებისა და კონტექსტის გათვალისწინებით, რომლის მომსწრეებიც ვართ ჩვენ. ნამდვილად, სასიცოცხლოდ მნიშვნელოვანია მსგავსი მხარდაჭერა ამერიკის შეერთებული შტატების მხრიდან“,-განაცხადა სოფო ქაცარავამ.
შეგახსენებთ, რომ აშშ-ის კონგრესს სირიის მიერ საქართველოს რეგიონების - აფხაზეთისა და სამხრეთ ოსეთის/ცხინვალის რეგიონის დამოუკიდებლობის აღიარების დამგმობი რეზოლუცია წარედგინა.
„ვგმობთ რუსეთის ფედერაციის ვასალი სახელმწიფოს (“client state”) - სირიის არაბული რესპუბლიკის მიერ აფხაზეთისა და სამხრეთ ოსეთის რეგიონების დამოუკიდებლობის აღიარებას“, - აღნიშნულია რეზოლუციაში.