იმდენად განსხვავებულია ღირებულებები, რომ უმრავლესობის ნაწილის გუნდიდან წასვლა გარდაუვალია, - ამის შესახებ პარლამენტის დამოუკიდებელმა დეპუტატმა დავით ჭიჭინაძემ ჟურნალისტებს განუცხადა.

როგორც ჭიჭინაძემ აღნიშნა, ბესელიას გუნდი წასვლის გადაწყვეტილებას თავად მიიღებს და ნაკლებად არის მოსალოდნელი, ისინი გარიცხონ.

„თქვენ მოისმინეთ ლევან გოგიჩაიშვილის და ზაქარია ქუცნაშვილის ეთერში გაკეთებული განაცხადებები. როგორ შეიძლება ამ ხალხის ერთ გუნდად წარმოდგენა, მე ნამდვილად გამიჭირდება. უმრავლესობა არ არის ერთგვაროვანი. დარწმუნებული ვარ, იმდენად განსხვავებულია ღირებულებები, რომ ეს პროცესი გარდაუვალია. არ მგონია, გარიცხვა იყოს. ეს ერთხელ უკვე გააკეთეს. გამრიცხეს პარტიიდან, უმრავლესობიდან და ფრაქციიდან. არ მგონია, დამფუძნებლების ასე გარიცხვა ადვილი იყოს, მით უმეტეს იმ ადამიანების, რომლებმაც პარტია შექმნეს. ალბათ, უფრო გარკვეული ნაბიჯი იქნება ამ ჯგუფიდან. ალბათ, ისინი დატოვებენ უმრავლესობას. შეიძლება ამ პროცესს თებერვალი დასჭირდეს. ვთვლი, რომ სანამ არსებობს რესურსი, მეტი ხალხი გადმოიყვანო შენს ჭკუაზე ამ კანონთან დაკავშირებით, მანამდე შიგნით უნდა იმუშაო. გაბუტვას და წამოსვლას ყოველთვის მოასწრებ",- განაცხადა ჭიჭინაძემ.

კითხვაზე, წაუყენა თუ არა ულტიმატუმი ბიძინა ივანიშვილმა გედევან ფოფხაძეს, ჭიჭინაძე პასუხობს, რომ არ იცის.