ჩემი პოზიცია სასამართლოსთან დაკავშირებით არის სრულიად ნათელი და მკაფიო. ჩემი ამოცანა ამ პროცესში არის ის, რომ ღია, კონკურენტული პროცესის შედეგად ავარჩიოთ საუკეთესო მოსამართლეები უზენაეს სასამართლოში. დანარჩენი არაფერი მაინტერესებს. ვისაც თავისი პრაგმატული მიზნები აქვს, ამას როგორ განახორციელებს, ეს მისი საქმეა, - ამის შესახებ პარლამენტის პირველმა ვიცე-სპიკერმა თამარ ჩუგოშვილმა განაცხადა.

კითხვაზე, ვანო ზარდიაშვილი არის თუ არა მოსამართლეების ლობისტი, ჩუგოშვილმა განაცხადა, რომ მას არანაირი შეხება არ ჰქონია ამასთან დაკავშირებით.

რაც შეეხება უვადო მოსამართლეების დანიშვნის შეჩერებას, რაც იურიდიულ საკითხთა კომიტეტის ყოფილი თავმჯდომარის, ეკა ბესელიას ინიციატივაა, ჩუგოშვილი ამბობს, რომ გასარკვევია იძლევა თუ არა ამის საშუალებას კონსტიტუცია.

"ვთხოვე ჩემს თანამშრომლებს, უკეთესად გავერკვეთ იძლევა თუ არა ამის შესაძლებლობას კონსტიტუცია. ეს ინიციატივა გულისხმობს სააპელაციო და პირველი ინსტანციის სასამართლოში მოსამართლეების დანიშვნას. აქ შეიძლება იყოს ორი ინტერესი. ერთი არის ის, რომ მეტი მოსამართლე სჭირდება სასამართლო კორპუსს და ქვეყანას, ვიდრე ჰყავს და ამ მოსამართლეების დანიშვნა უნდა მოხდეს ისე, რომ მაქსიმალურად კარგი ადამიანები შეირჩნენ. ასევე გვჭირდება ის, რომ მოსამართლეები, რომლებიც ახლა გამოსაცდელ ვადაზე არიან, არიან კეთილსინდისიერები, მშრომელები, აკეთებენ საქმის უდიდეს ნაწილს, მათ ჩვენ ხელი არ უნდა შევუშალოთ უვადო დანიშვნაზე. ბუნებრივია, რომ მათ არავინ ერჩის და არ უპირებს გამოსაცდელ ვადაში ყოფნას იმაზე მეტი ხნით, ვიდრე მათ ეკუთვნით.

კანონპროექტი უკეთ უნდა ვნახო მე თვითონ, რომ წარმოდგენა მქონდეს, რა ნაწილს ფარავს",- განაცხადა ჩუგოშვილმა.