ამ დღენახევრის განმავლობაში მე მოვისმინე კრიტიკა, ტყუილი, შეურაცხყოფა, თუმცა ვერ მოვისმინე ვერც ერთი დასაბუთებული მოსაზრება, - ამ სიტყვით დაასრულა საკუთარი გამოსვლა პარლამენტში განათლების, მეცნიერებისა და სპორტის მინისტრმა მიხეილ ბატიაშვილმა და იქვე დასძინა, რომ მას ჰქონდა „დე ჟავუ“, თითქოს 9 წლის წინ ცხოვრობდა“.

„ეს ყველაფერი გავლილია, დღენახევარი, რაც აქ ვარ, „დე ჟავუს“ შეგრძნება მაქვს - „დე ჟავუს“, თითქოს მე ვცხოვრობ დაახლოებით 9 წლის წინ. ერთი, რაც შემიძლია ვთქვა: მინდა მადლობა ვუთხრა ,,ქართულ ოცნებას“, რომ დღეს, როდესაც მე აქედან გავალ, მე არ ვცხოვრობ ისევ 9 წლის წინანდელ რეალობაში და ვცხოვრობ იქ, სადაც ასეთ ადამიანებსაც აქვთ აზრის გამოთქმის საშუალება და ჩვენ ყველას ერთად შეგვიძლია ვუსმინოთ და ღირებული პასუხები გავცეთ. მე მჯერა, რომ იმ გზას, რომელიც ავირჩიეთ, გზას, რომელიც მიმართულია რეფორმებისკენ, ალტერნატივა არ აქვს. ამ დღენახევრის განმავლობაში მე მოვისმინე კრიტიკა, ტყუილი, შეურაცხყოფა, თუმცა ვერ მოვისმინე ვერც ერთი დასაბუთებული მოსაზრება, რომელიც მიმართული იყო რეფორმისკენ,“ - განაცხადა მიხეილ ბატიაშვილმა და იქვე ხაზგასმით აღნიშნა, რომ მზად არის მოისმინოს რეფორმებთან დაკავშირებული ყველა საღი აზრი და კომუნიკაცია ჰქონდეს ყველა დაინტერესებულ მხარესთან.