„ევროპულმა საქართველომ“ პარლამენტის პლენარულ სხდომაზე ია კერზაიას საქმესთან დაკავშირებით ვიდეო-ექსპერიმენტი წარადგინა, რომელშიც პარტიის წარმომადგენელი ცდილობს განათლების სამინისტროში ანონიმური წერილის შეტანას. ვიდეოს შესახებ სერგი კაპანაძემ ისაუბრა და მინისტრს მიმართა, რომ ლავრენტი ქირიას წერილი უწყებაში ვერ მოხვდებოდა თუ ეს შიგნიდან ორგანიზებული არ იყო.

„დღეს დილით გადავწყვიტეთ ექსპერიმენტი ჩაგვეტარებინა, გავგზავნეთ ჩვენი წარმომადგენელი განათლების სამინისტროში, მიიტანა ანონიმური წერილი, ოღონდ წერილი, რომელსაც როგორც ქირიას ანონიმურ წერილზე, ისე ეწერა სახელი და გვარი და ფიქტიური მისამართი. მაინტერესებდა, ჩაიბარებდნენ თუ - არა. განათლების სამინისტროში უპასუხეს, რომ წერილს თუ აბარებთ, რომელსაც სახელი, გვარი და მისამართი აწერია,მაშინ პირადი ნომერიც უნდა ეწერესო, ისე არ იბარებენ. თუ ანონიმურ წერილზეა საუბარი, მაშინ არაფერი არ უნდა ეწერესო. ქირიას წერილზე ეწერა სახელი და გვარი და ფიქტიური მისამართი. თქვენი საუბარი, რომ ვალდებული ხართ რეაგირება მოახდინოთ, ძალიან მარტივადაა მოკლეფეხებიანი ტყუილი. თქვენ სისტემაში არც მოხვდება ასეთი ტიპის წერილი, თუ ეს შიგნიდან ორგანიზებული არაა“, - განაცხადა სერგი კაპანაძე.