მე უზრუნველვყოფ, რომ ამ საკითხზე უმრავლესობის შიგნით სათანადო მსჯელობა გაიმართოს,- ამის შესახებ საპარლამენტო უმრავლესობის ლიდერმა არჩილ თალაკვაძემ მოსამართლეთა უვადოდ დანიშვნის პროექტის გადადების ინიციატივის კომენტირებისას განაცხადა.
,,ჩემი მოვალეობაა, მოვისმინო ამ საკითხთან დაკავშირებით ყველა არგუმენტი, გავმართო მსჯელობა და ამის შემდეგ მივიღო გადაწყვეტილება. ეს პროცესი წინ გვაქვს. ჩვენ მხარს დავუჭერთ მხოლოდ ისეთ გადაწყვეტილებებს, რომელიც ემსახურება სასამართლოს დამოუკიდებლობის გაზრდას, სასამართლოს ეფექტიანობის გაუმჯობესებას, შესაბამისად, ეს ინიციატივაც ამ ჭრილში განიხილება“, - აღნიშნა თალაკვაძემ.
ჟურნალისტების კითხვაზე, ეთანხმება თუ არა ვანო ზარდიაშვილის მიერ გამოთქმულ შეფასებებს, რომ კანონპროექტი დამწყები იურისტების მიერაა მომზადებული, თალაკვაძემ უპასუხოა, რომ კოლეგებს შეურაცხყოფას არ მიაყენებს. „მე უზრუნველვყოფ, რომ უმრავლესობის შიგნით პროცესები საქმიან და პატივისცემით გამსჭვალულ გარემოში განვითარდეს. ჩემგან ვერ მიიღებთ ისეთ კომენტარს, რომელიც ჩემი რომელიმე კოლეგის ღირსებას, ინტერესებს ან დამოკიდებულებებს შეურაცხყოფს", - დასძინა დეპუტატმა.