ვაკის გამგეობიდან „ქართული ოცნების“ მხარდამჭერებისთვის თანხების გაცემა, ხეების მოჭრა და ყოფილი მთავარი პროკურორის ოთარ ფარცხალაძის სახელთან დაკავშირებული კომპანიისთვის ვაკეში მიწის გადაცემა - ეს ის საკითხებია, რომლის დაყენებასაც საკრებულოს დღევანდელ სხდომაზე ფრაქცია „ნაციონალური მოძრაობა“ აპირებს.

როგორც „ინტერპრესნიუსს“ „ნაციონალური მოძრაობის“ წევრმა ლევან ხაბეიშვილმა განუცხადა, ოპოზიცია დღევანდელ სხდომაზე იმ კვლევის წარდგენას მოითხოვს, რომლის საფუძველზეც დედაქალაქში ხეების მოჭრა იგეგმება.

„კახა კალაძემ მთავრობის სხდომაზე განაცხადა კვლევას ჩავატარებთ, რომლის საფუძველზეც ხეები უნდა მოიჭრასო. ჩვენ ვითხოვთ, გვაჩვენოს, სად არის ეს კვლევა. რა თქმა უნდა, ჯანმრთელ ხეებსაც მოჭრიან. თვითონ ამბობს, რომ ბიზნეს-ჯგუფების ტერიტორიაზეა უფრო მეტი დაზიანებული ხეო,“ - განაცხადა ლევან ხაბეიშვილმა.