თსუ-ს ემერიტუსმა პროფესორმა მზექალა შანიძემ „წლის პირველი საჯარო ლექციის“ ფარგლებში ივანე ჯავახიშვილის სახელობის თბილისის სახელმწიფო უნივერსიტეტში საჯარო ლექცია „ქართული ხელნაწერები - ჩვენი კულტურული მემკვიდრეობა“ წაიკითხა.

როგორც „ინტერპრესნიუსს“ თბილისის სახელმწიფო უნივერსიტეტიდან აცნობეს, ლექციას თსუ-ს რექტორი გიორგი შარვაშიძე, სახელმწიფო ენის დეპარტამენტის თავმჯდომარე გიორგი ალიბეგაშვილი, პროფესორ-მასწავლებლები, სტუდენტები და სტუმრები ესწრებოდნენ.

მათივე ინფორმაციით, უნივერსიტეტის რექტორმა პროფესორი მზექალა შანიძე უნივერსიტეტის საიუბილეო მედლით დააჯილდოვა.

თსუ-ს რექტორის გიორგი შარვაშიძის თქმით, მნიშვნელოვანია, რომ სხვადასხვა თაობის პროფესორები, მკვლევრები, სტუდენტები ერთმანეთს ხვდებიან და ამის შესაძლებლობას „პირველი საჯარო ლექციაც“ იძლევა.

„101 წლის წინ, 12 თებერვალს, ამ კედლებში დიდმა ივანემ პირველი საჯარო ლექცია წაიკითხა. 2015 წელს ეს ტრადიცია აღდგა და მას შემდეგ გამოჩენილი ქართველი მეცნიერები, საზოგადოებისთვის ცნობადი სახეები საჯარო ლექციას კითხულობენ. მზექალა შანიძე ძალიან საინტერესოდ გვესაუბრა სპეციალისტებსაც და არასპეციალისტებსაც ქართულ ხელნაწერებზე. კარგია, რომ ეს ტრადიცია გრძელდება“, - განაცხადა თსუ-ს რექტორმა.

„უნივერსიტეტმა ძალიან კარგი ტრადიცია შემოიღო - მან აღადგინა პირველი საჯარო ლექციის წაკითხვის ტრადიცია, რომელიც ივანე ჯავახიშვილის დაწყებეულია. ეს ჩემთვის დიდი პატივია. ეს ტრადიცია უთუოდ გვაკავშირებს ჩვენ იმ დროსთან, როდესაც უნივერსიტეტი დაარსდა და გვაძლევს საშუალებას გავითვალისწინოთ ბევრი მნიშვნელოვანი საკითხი, რომელიც იმთავითვე იყო უნივერსიტეტის მესვეურთა მიერ დასმული - ქართული ენის მდგომარეობა, ქართული და ქართველური ენების შესწავლა და ქართული ხელნაწერების შესწავლა. ივანე ჯავახიშვილი, უნივერსიტეტის დამაარსებელი, ძალიან დიდი სპეციალისტი იყო თვითონ ქართული ხელნაწერებისა“, - განაცხადა მზექალა შანიძემ.

„წლის პირველი საჯარო ლექცია“ თსუ-ში ყოველწლიურად ტარდება. პირველი საჯარო ლექცია პირველად 101 წლის წინ, 1918 წლის 12 თებერვალს (ძველი სტილით 30 იანვარს) უნივერსიტეტის სტუდენტებისთვის წაიკითხა ივანე ჯავახიშვილმა “ადამიანის პიროვნება და მისი მნიშვნელობა ძველ ქართულ საისტორიო-საფილოსოფო მწერლობასა და ცხოვრებაში“ (ადამიანი ძველ ქართულ მწერლობასა და ცხოვრებაში).

„წლის პირველი საჯარო ლექციის“ ფარგლებში პირველი საჯარო ლექცია „ჩვენი სახელმწიფო“ 2015 წლის 12 თებერვალს წაიკითხა საქართველოს პარლამენტის თავმჯდომარემ დავით უსუფაშვილმა; 2016 წელს თსუ-ს ემერიტუს პროფესორმა, აკადემიკოსმა მარიამ ლორთქიფანიძემ წაიკითხა საჯარო ლექცია „რამ გადაგვარჩინა?“. 2017 წლის 12 თებერვალს საქართველოს ეროვნული მუზეუმის დირექტორმა დავით ლორთქიფანიძემ წაიკითხა საჯარო ლექცია „თანამედროვე მონაცემები უძველესი ჰომოს შესახებ;“ 2018 წლის 12 თებერვალს თსუ-ს პროფესორმა ლევან გიგინეიშვილმა წაიკითხა საჯარო ლექცია თემაზე „იოანე პეტრიწის ჰენადების თეორია და მისი ახალი ანთროპოლოგია", - აღნიშნულია ინფორმაციაში.