თავის დროზე, უსაფრთხოებისა და კრიზისების მართვის საბჭოს გაუქმების გადაწყვეტილების მიღება იმას არ ნიშნავდა, რომ მთლიანად უარი ვთქვით ამ სისტემაზე - ამ შემთხვევაში ჩვენ ერთმანეთისაგან გავმიჯნეთ კრიზისების მართვა და პოლიტიკური და სტრატეგიული გადაწყვეტილებების მიღება, - აღნიშნული განმარტება დღეს თავდაცვისა და უშიშროების კომიტეტის თავმჯდომარემ ირაკლი სესიაშვილმა გააკეთა.

“როგორც კი უსაფრთხოებისა და კრიზისების მართვის საბჭო გაუქმდა, დავიწყეთ მსჯელობა იმის თაობაზე, რომ საჭირო იყო იმ ორგანოს შექმნა, რომელიც უსაფრთხოებისა და თავდაცვის პოლიტიკის დაგეგმვის და კოორდინაციისთვის იქნებოდა ხელშემწყობი. მე მაშინ მთავრობას, პრემიერ-მინისტრს შევთავაზე, რომ დროებით ერთიანი ეროვნული ანალიტიკური ცენტრი შექმნილიყო. თავდაცვის მინისტრმა ასეთი საკოორდინაციო საბჭო გააკეთა, რომელიც დღესაც მოქმედებს, რათა იმ პერიოდში, ვიდრე არ არის შექმნილი ეროვნული უსაფრთხოების საბჭო, შესაბამის ძალოვან უწყებებს კოორდინაციის საშუალება ჰქონდეთ“, - განაცხადა ირაკლი სესიაშვილმა.

კომიტეტმა პირველი მოსმენით, “ეროვნული უსაფრთხოების პოლიტიკის დაგეგმვისა და კოორდინაციის წესის შესახებ“ კანონში ცვლილებები განიხილა, რომელიც პრემიერ-მინისტრის სათათბირო ორგანოს - ეროვნული უსაფრთხოების საბჭოს ჩამოყალიბებას ითვალისწინებს.

პროექტის თანახმად, ეროვნული უსაფრთხოების საბჭო ეროვნული უსაფრთხოების პოლიტიკის დაგეგმვას გაუწევს კოორდინაციას და მის შემადგენლობაში შევა რვა მუდმივმოქმედი წევრი: თავდაცვის მინისტრი, შინაგან საქმეთა მინისტრი, ფინანსთა მინისტრი, საგარეო საქმეთა მინისტრი, სახელმწიფო უსაფრთხოების სამსახური, დაზვერვის სამსახური და თავდაცვის ძალების მეთაური, მათ შორის, პრემიერ-მინისტრი, როგორც საბჭოს მუდმივმოქმედი წევრი. უსაფრთხოების საბჭოს მდივანი საბჭოს ერთ-ერთი მუდმივმოქმედი წევრი იქნება.

ინიცირებული კანონპროექტით განისაზღვრა, რომ სხვადასხვა კრიზისული ვითარების მართვას პრემიერ-მინისტრი ეროვნული სიტუაციური ოთახის მეშვეობით ახორციელებს, რომელიც სპეციალური ტექნიკით აღჭურვილ პუნქტს წარმოადგენს.

“დღეს ეროვნულ სიტუაციურ ოთახს იყენებს საგანგებო სიტუაციების მართვის სამსახური საგანგებო სიტუაციების მართვის მიზნით. თუმცა, წარმოდგენილი ცვლილებების გათვალისწინებით, მიზანშეწონილია, რომ ის არა მხოლოდ საგანგებო სიტუაციების, არამედ სხვა კრიზისული ვითარების (ეროვნული უსაფრთხოების ხელყოფის, შიდაპოლიტიკური დესტაბილიზაციის) სტრატეგიულ დონეზე მართვის ინსტრუმენტად იყოს გამოყენებული“, - განაცხადა მთავრობის საპარლამენტო მდივანმა ნათია მიქელაძემ.

პროექტის თანახმად, საბჭოს ეყოლება ცალკე, დამოუკიდებელი აპარატი. ეროვნული უსაფრთხოების საბჭოსთვის დაფინანსება განხორციელდება სახელმწიფო ბიუჯეტით.

ეროვნული უსაფრთხოების საბჭოს აპარატში დასაქმებული იქნებიან როგორც საჯარო მოსამსახურეები, ასევე სახელმწიფო სპეციალური წოდების მქონე პირები. იმ მოსამსახურეებზე, რომლებსაც მიენიჭებათ სახელმწიფო სპეციალური წოდება, გავრცელდება სახელმწიფო სპეციალური წოდების მქონე პირების მიმართ საქართველოს კანონმდებლობით გათვალისწინებული შეღავათები და შეზღუდვები.