"გვქონია პრაქტიკა, როცა პრეზიდენტს და პრემიერს არ ჰქონდათ კარგი ურთერთობა", - ამის შესახებ უშიშროების საბჭოს მდივნის ყოფილმა მოადგილემ თეონა აქუბარდიამ განაცხადა.

"კანონპროექტთან დაკავშირებით პრობლემები საკმაოდ მრავლად არის.

პირველი ის, რომ გარკვეულწილად კანონპროექტის შემუშავების პროცესი იყო დახურული. აქ არ იყო ჩართული არც ადგილობრივი ექსპერტი, არც უცხოელი პარტნიორი ქვეყნებიდან იყვნენ წარმოდგენილი ექსპერტები, რაც ძალიან ცუდია.

დღეს ვერ მოვისმინე ლოგიკური არგუმენტები თუ როგორ ურთიერთმოქმედებს პრემიერის სათათბირო უსაფრთხოების საბჭო პრეზიდენტის თავდაცვის საბჭოსთან.

მნიშვნელოვანია, რომ ეს ურთიერთმოქმედება ჩანდეს. დღეს აქ საუბარი იყო, რომ პრემიერს და პრეზიდენტს საკმაოდ კარგი ურთიერთობა აქვთ და მათ შეუძლიათ ერთმანეთთან საუბარი საფრთხეების შემთხვევაში. ჩვენ გვქონია პრაქტიკა, როდესაც პრეზიდენტს არ ჰქონდა კარგი ურთიერთობა ქვეყნის პრემიერთან. იმისათვის, რომ პოლიტიკური რისკები თავიდან ავიცილოთ, აუცილებელია ინსტიტუციური პლატფორმა არსებობდეს, რომ ეს ორი უმაღლესი თანამდებობის პირი ერთმანეთს ესაუბროს. პრაქტიკა ამის დასტურია, სამწუხაროდ, უშიშროების საბჭოები ჩნდებოდა და ქრებოდა საქართველოში ერთი თუ ორი პირის ინიციატივის გამო. მაგალითად ირაკლი ღარიბაშვილს სურდა, რომ ჰქონოდა უსაფრთხოების საბჭო მის ქვეშ და შეიქმნა ასეთი საბჭო. პრემიერ კვირიკაშვილს სურდა გაუქმებულიყო და მინდია ჯანელიძის საბჭო, რომელიც ღარიბაშვილის დროს იყო, გაუქმდა. ნებისმიერ შემთხვევაში პარლამენტი ტაშს უკრავდა ამ გადაწყვეტილებას, რომელიც იყო ამა თუ იმ პრემიერის მიერ წარმოდგენილი. ძალიან მნიშვნელოვანია, რომ არ გავაგრძელოთ ეს მავნე პრაქტიკა და უშიშროების საბჭო არ იქმნებოდეს პიროვნებებზე მორგებით. ეს უნდა იყოს ქვეყნის ინტერესებზე მორგებული. დღეს იქნება პრემიერი ბახტაძე, ხვალ გახარია თუ ზეგ იქნება ვინმე სხვა, ინსტიტუტი უნდა მუშაობდეს", - განაცხადა აქუბარდიამ.