აშშ-ს კონგრესი ვენესუელაში აშშ-ის სამხედრო ინტერვენციას მხარს არ დაუჭერს, - ამის შესახებ აშშ-ის წარმომადგენელთა პალატის საგარეო ურთიერთობების კომიტეტის ხელმძღვანელმა, “დემოკრატმა” ელიოტ ენგელმა განაცხადა.
“აშშ-ის სამხედრო ინტერვენცია არ წარმოადგენს შესაძლო ვარიანტს. კონგრესი წყვეტს, სად და როდის იქნება გამოყენებული შეიარაღებული ძალები და შესაბამისად, კონგრესი მხარს არ დაუჭერს ვენესუელაში სამხედრო ინტერვენციას”, - აღნიშნა ელიოტ ენგელმა.
ამავდროულად მან მხარი დაუჭირა დონალდ ტრამპის ადმინისტრაციის კურსს, რომელიც ვენესუელას გარდამავალ პრეზიდენტად ხუან გუაიდოს აღიარებს. აღსანიშნავია, რომ აქამდე აშშ-ის პრეზიდენტი დონალდ ტრამპი და ეროვნული უსაფრთხოების საკითხებში მისი მრჩეველი ჯონ ბოლტონი აცხადებდნენ, რომ ვენესუელაში სამხედრო ინტერვენცია ერთ-ერთ შესაძლო ვარიანტად განიხილება.