ეროვნული უშიშროების საკითხებში აშშ-ს პრეზიდენტის თანაშემწის ჯონ ბოლტონის განცხადებით, ვენესუელას შეიარაღებული ძალების სარდლობის წარმომადგენლები ოპოზიციასთან საიდუმლო მოლაპარაკებებს აწარმოებენ.

„შემიძლია განვაცხადო, რომ წამყვანი გენერლები და პოლიტიკოსები, რომლებიც მხარს უჭერენ მადუროს, მუდმივ მოლაპარაკებებს აწარმოებენ ოპოზიციასთან. მადურო ამას ვერ ხედავს, ეს ფარულად ხდება. თუმცა, მოლაპარაკებები მიმდინარეობს“, - განაცხადა ჯონ ბოლტონმა ტელეარხ Fox News-სთვის მიცემულ ინტერვიუში.

ეროვნული უშიშროების საკითხებში აშშ-ს პრეზიდენტის თანაშემწემ ასევე აღნიშნა, რომ ვენესუელაში კორუფცია ყველაზე უფრო შეიარაღებულ ძალებში შეინიშნება.

„ვენესუელაში ორი ათასამდე გენერალია. უფრო მეტი, ვიდრე ნატო-ს ყველა წევრ ქვეყანაში ერთად აღებული. ეს ცხადყოფს თუ სად არის კორუფცია“, - დასძინა მან.