იუსტიციის უმაღლესი საბჭოს არამოსამართლე წევრი ანა დოლიძე პარლამენტს მიმართავს, შეიქმნას საგამოძიებო კომისია, რომელიც მოსამართლეთა ქონების კანონიერებას დაადგენს.
როგორც ანა დოლიძემ ჟურნალისტებს განუცხადა, მოსამართლეთა ქონების შესახებ ტელევიზიით გასული სიუჟეტი სასამართლო სისტემაში შესაძლო კორუფციის არსებობაზე მიუთითებდა.
"რუსთავი 2"-ის სიუჟეტი ნამდვილად მოიცავდა საკმაოდ შემაშფოთებელ ინფორმაციას, სასამართლო სისტემაში შესაძლო სისტემური კორუფციის შესახებ. მე, როგორც ერთ-ერთი მოქალაქე და საბჭოს წევრიც, შევშფოთდი და მივმართავ შესაბამისად, საქართველოს პარლამენტს, რომელსაც პირდაპირ ეკუთვნის მსგავსი მაღალი დონის, ფართომასშტაბიანი და სისტემური ტიპის კორუფციასთან დაკავშირებით გამოძიების წარმართვა. მე ვფიქრობ, რომ სწორედ საქართველოს პარლამენტში უნდა შეიქმნას დროებითი საგამოძიებო კომისია, სადაც ეს ნაწყენი მოსამართლეებიც, კომპანიაც, შესაძლო კორუფციის შესახებ თავისი ინფორმაციით მივა და საჯაროდ, ხალხის თანდასწრებით იქ დადგინდება სიმართლე, მართლაც რამდენად აქვს ადგილი სისტემურ და ელიტურ კორუფციას ჩვენს სასამართლო სისტემაში, რადგან ასეთის არსებობის შემთხვევაში, ჩვენ პერსპექტივას - ეს იყოს დამოუკიდებლი და ევროპული სახელმწიფო, ფაქტობრივად, მომავალი არ აქვს", - განაცხადა ანა დოლიძემ.
შეგახსენებთ, ტელეკომპანია "რუსთავი 2"-ის ეთერში სიუჟეტი გავიდა, სადაც რამდენიმე მოსამართლის ქონებაზე იყო საუბარი, მათ შორის, მოსამართლე დიმიტრი გვრიტიშვილის, თამარ ალანიას და მერაბ გაბინაშვილის ქონების შესახებაც. საბჭოს არამოსამართლე წევრები, ნაზი ჯანეზაშვილი და ანა დოლიძე მიიჩნევენ, რომ მოსამართლეთა ქონების კანონიერების თაობაზე გამოძიება უნდა დაიწყოს. ამ განცხადებებს კი საბჭოს დღევანდელი სხდომის დაწყებამდე არამოსამართლე წევრებსა და მოსამართლეებს შორის კამათი მოჰყვა.