ეს პროცესი დაცლილი იყო ყოველგვარი სამართლებრივი არგუმენტებისა და მსჯელობისგან, - ასე აფასებს იურიდიულ საკითხთა კომიტეტის თავმჯდომარე ანრი ოხანაშვილი კომიტეტის დღევანდელ სხდომას. მისი თქმით, დღევანდელ სხდომაზე კანონპროექტის ავტორებმა მარტივ კითხვებს ვერ გასცეს პასუხი და ვერ მოიყვანეს ვერც ერთი სამართლებრივი არგუმენტი, თუ რატომ უნდა გადავადდეს მოსამართლეთა უვადოდ დანიშვნა 2024 წლამდე.
"დავსვი მარტივი კითხვა, აღნიშნული კანონპროექტი უზრუნველყოფდა თუ არა კიდევ უფრო კვალიფიციური მოსამართლეები შესულიყვნენ სისტემაში და უფრო სწრაფად მომხდარიყო პროცესების წარმართვა სასამართლოში. ამ მარტივ კითხვაზე ვერ მივიღე პასუხი. ეს პროცესი დაცლილი იყო ყოველგვარი სამართლებრივი არგუმენტებისა და მსჯელობისგან", - განაცხადა ანრი ოხანაშვილმა.
იურიდიულ საკითხთა კომიტეტმა 9 დეპუტატის მიერ ხელმოწერილ „საერთო სასამართლოების შესახებ“ კანონპროექტს მხარი არ დაუჭირა. აღნიშნული ინიციატივა მიზნად ისახავს მოსამართლეთა უვადოდ გამწესების 2024 წლის 31 დეკემბრამდე გადავადებას. დეპუტატები აღნიშნულ საკითხზე სამსაათნახევრის განმავლობაში ცხარე კამათის ფონზე მსჯელობდნენ.