დეპუტატ გედევან ფოფხაძის შეფასებით, მოსამართლეთა უვადოდ დანიშვნის წესის ამოქმედება შეცდომა იყო, რაც უნდა გამოსწორდეს.

როგორც ფოფხაძემ ტელეკომპანია “პალიტრანიუსის“ გადაცემა “360 გრადუსში“ განაცხადა, გარკვეულმა პოზიტიურმა უფლებამ ერთ მოცემულობაში შესაძლოა კარგად იმუშაოს, სხვა მოცემულობაში - საპირისპირო შედეგი გამოიწვიოს.

“მე დავინახე, რომ იუსტიციის უმაღლეს საბჭოს შეუძლია მოსამართლეები უვადოდ დანიშნოს და ის ამ უფლებას ბოროტად იყენებს. მოსამართლის უვადოდ დანიშვნა პრინციპის დონეზე არის თუ არა მისაღები, ეს იურიდიული ნიუანსია, მაგრამ არის მოცემულობა და ამ მოცემულობაში ეს უფლება ბოროტად არის გამოყენებული. არ შეიძლება ერთი და იგივე სტანდარტი კარგი იყოს სხვადასხვა მოცემულობაში“, - განაცხადა გედევან ფოფხაძემ.

მისივე თქმით, იუსტიციის უმაღლესი საბჭო უვადო მოსამართლებად განამწესებს არა საზოგადოებისათვის მისაღებ ადამიანებს, არამედ გადაწყვეტილებებს ჯგუფის ინტერესის გათვალისწინებით იღებს.

იხილეთ ვიდეო: "ჩვენ უნდა მივიღოთ ეს კანონი, შევაჩეროთ უვადო დანიშვნები"