მაია ცქიტიშვილი - იმედი მაქვს, იმის გამო აღარ ვიქნები მინისტრი, რომ დასვენებას მე თვითონ მოვინდომებ და არა გარე პოლიტიკური თუ საგამოძიებო ორგანოების გამო

იმედი მაქვს, იმის გამო აღარ ვიქნები მინისტრი, რომ დასვენებას მე თვითონ მოვინდომებ და არა გარე პოლიტიკური თუ საგამოძიებო ორგანოების გამო, ასე რომ, მგონია ჯერჯერობით არ მემუქრება არც ერთი და არც მეორე, - ამის შესახებ რეგიონული განვითარებისა და ინფრასტრუქტურის მინისტრმა მაია ცქიტიშვილმა პარლამენტში „მინისტრის საათის“ ფარგლებში დეპუტატ რომან გოცირიძის შეკითხვის პასუხად განაცხადა, რომელიც მაია ცქიტიშვილის წინამორბედების ცვლილების საკითხს ეხებოდა.

ამასთან, ცქიტიშვილმა ყურადღება გაამახვილა დეპუტატ ნატო ჩხეიძის რეპლიკაზე, რომელმაც განაცხადა, რომ „ქალისთვის ინფრასტრუქტურის მინისტრობა მეტისმეტად მძიმე ტვირთია“.

„6 მინისტრი რატომ შეიცვალაო... და მე მინდა, ბატონ რომანს ვუთხრა, რომ მეც შევიცვლები, სულ მე არ ვიქნები ინფრასტრუქტურის მინისტრი. მიუხედავად იმისა, რომ ქალბატონი ვარ, მაინც ძალიან მომწონს სამშენებლო სექტორი და მგონია, რომ ბევრი ვიცი და ბევრი რამის გაკეთება შემიძლია. მე 6 წლის განმავლობაში ამ პოზიციაზე დარჩენის სურვილი არ მექნებოდა და ბატონო რომან, ოდესღაც დასვენებასაც დავიმსახურებ, მაგრამ ამ შემთხვევაში, მე იმედი მაქვს, რომ იმის გამო აღარ ვიქნები მინისტრი, რომ დასვენებას მე თვითონ მოვინდომებ და არა გარე პოლიტიკური თუ საგამოძიებო ორგანოების გამო. ასე რომ, მგონია ჯერჯერობით არ მემუქრება არც ერთი და არც მეორე.

მოდი, თბილისიდან გავიდეთ, იქნებ თქვენც გამოხვიდეთ თბილისიდან. თბილისშიც ძალიან ბევრი რამ გაკეთდა, მაგრამ რადგან ინფრასტრუქტურის სამინისტრო ძირითადად, რეგიონებში ახორციელებს ამ 9 მილიარდის პროექტებს, ყველაფერი იმ რეგიონებში ჩანს, სადაც ვაკეთებთ და ძალიან ბევრი პროექტი, რასაც ვაკეთებთ, არ ვხსნით, რადგან სოფლის გზის გასხნა ჩემთვის უხერხულია. ნამდვილად, პროპაგანდა აკლია და დანახვის სურვილი როდესაც აქვს ადამიანს, დაინახავს. მაგრამ ჩემთვის მთავარია, რომ ის ადამიანები,რომლებიც რეგიონებში ცხოვრობენ, რომლებიც ამ გზებით გადაადგილდებიან, რომლებიც ამ ონკანში მოშვებულ წყალს დალევენ, განსაკუთრებით იქ, სადაც ათეულობით წლის განმავლობაში წყალი არ იყო, ისინი ამ პროექტებს დაინახავენ“, - განაცხადა მაია ცქიტიშვილმა.

რამაზ საყვარელიძე - პროპორციული საარჩევნო სისტემა კიდევ უფრო მარცხიანს გახდის ოპოზიციის მდგომარეობას
ქართული პრესის მიმოხილვა 05.06.2020
თედო ჯაფარიძე - არ მგონია, რომ ამერიკის "დასუსტებით" რუსეთმა ან რომელიმე სხვა ქვეყანამ საკუთარი პოზიციები გაიმაგროს
მითები და რეალობა ჰესების შესახებ
ფინკა ბანკისა და სიმბიოტიკსის თანამშრომლობა მეწარმეების დაკრედიტების მიმართულებით გრძელდება
„ვისოლში“ საწვავზე წლის მიმდინარე პერიოდში რეკორდულად დაბალი ფასები დაფიქსირდა