გორში 9 წლის გოგონას, ნანიკო ბერიაშვილის მკვლელობის საქმეზე ბრალდებული იაგო ნებიერიძის სასამართლო პროცესი ამ წუთებში რუსთავის N6 პენიტენციურ დაწესებულებაში მიმდინარეობს.

როგორც პროცესის დაწყებამდე ჟურნალისტებს პროკურორმა ნანა გუგუტიშვილმა განუცხადა, გარდა მტკიცებულებების დასაშვებობის საკითხის განხილვისა, დღეს იაგო ნებიერიძის მიმართ შეფარდებული აღკვეთის ღონისძიება პატიმრობა გადაისინჯება.

„პენიტენციური დეპარტამენტის მე-6 დაწესებულებაში იაგო ნებიერიძის ბრალდების სისხლის სამართლის საქმეზე წინასასამართლო სხდომა ტარდება.

აღნიშნულ სხდომაზე სასამართლო იმსჯელებს ბრალდების მხარის მიერ წარმოდგენილი მტკიცებულებების დასაშვებობისა და ასევე, საქმის არსებითად განსახილველად გადაცემის საკითხზე. ასევე, დღეს გადაისინჯება იაგო ნებიერიძის მიმართ გამოყენებული პატიმრობა.

ყველა მტკიცებულება, რაც ბრალდების მხარის მიერ მოპოვებულია, წარმოდგენილია სასამართლოში, რაზეც დღეს სასამართლო იმსჯელებს", - განაცხადა გუგუტიშვილმა.

გორში 9 წლის ნანიკო ბერიაშვილი 25 ოქტომბერს გაუჩინარდა. ის რამდენიმე საათში სამართალდამცველებმა გარდაცვლილი იპოვეს. განზრახ მკვლელობის ბრალდებით 33 წლის, წარსულში ნასამართლევი იაგო ნებიერიძე დააკავეს.