სამწუხაროდ, ივანიშვილის ხელისუფლება იმგვარად მორგებულ კანონპროექტს გვთავაზობს, რომლითაც ისევ ეს მმართველი კლანი მიიღებს გადაწყვეტილებას, - ამის შესახებ "ევროპული საქართველოს" წევრმა ოთარ კახიძემ ჟურნალისტებს პარლამენტის თავმჯდომარესთან შეხვედრის დასრულების შემდეგ განუცხადა. მისი თქმით, წარმოდგენილ პროექტში, სადაც საუბარია უზენაესი სასამართლოს მოსამართლეთა შერჩევის კრიტერიუმებსა და პროცედურებზე, არ არის გათვალისწინებული საერთაშორისო პარტნიორების, არასამთავრობო სექტორის, პოლიტიკური პარტიების, სახალხო დამცველისა და ადვოკატთა ასოციაციის რეკომენდაციები.

"დღესდღეობით იუსტიციის უმაღლეს საბჭოში სასამართლოს მმართველ კლანს აქვს გარანტირებული 11 ხმა. ამ 11 ხმით წარადგინეს ის დეკემბრის 10-კაციანი სია, რომლითაც პრაქტიკულად იგნორირება გაუკეთეს კანონმდებლობას და საკუთარი თავი წარუდგინეს პარლამენტს დასამტკიცებლად. ყველა პოლიტიკური ჯგუფი, საერთაშორისო პარტნიორები, არასამთავრობო ორგანიზაციები, სახალხო დამცველი და ადვოკატთა ასოციაცია მოუწოდებს ხელისუფლებას, რომ შეცვალოს ეს წესი, რომ მხოლოდ ამ 11 ადამიანს არ ჰქონდეს კანდიდატების პარლამენტისთვის წარდგენის უფლება. სამწუხაროდ, ივანიშვილის ხელისუფლება იმგვარად მორგებულ კანონპროექტს გვთავაზობს, რომლითაც ისევ ეს 11 ადამიანი მიიღებს გადაწყვეტილებას. ეს "ევროპული საქართველოსთვის" და ყველა მოთამაშისთვის, ვინც ამ ოთახშია, გარდა "ქართული ოცნებისა", კატეგორიულად მიუღებელია. ამერიკის საელჩო, USAID, ევროკავშირი, ევროსაბჭო - არც ერთი ამ ფიგურების რეკომენდაციები არ არის ასახული. "ქართული ოცნება" ჯიუტად ცდილობს საკუთარი ვარიანტი გაიტანოს. ასე რქებით გატანის მცდელობა გააღრმავებს ამ კრიზისს, რომელიც უკვე შექმნილია", - განაცხადა ოთარ კახიძემ.

საქართველოს პარლამენტის თავმჯდომარე ირაკლი კობახიძე დიპლომატიური კორპუსის, არასამთავრობო ორგანიზაციებისა და სასამართლო ხელისუფლების წარმომადგენლებს შეხვდა, სადაც უზენაესი სასამართლოს მოსამართლეობის კანდიდატთა შერჩევის პროცედურასა და კრიტერიუმებთან დაკავშირებით იმსჯელეს.