ამ დღეებში, როცა ჩვენი ქვეყნის მიერ საბჭოთა ოკუპაციასთან ბრძოლაში გაღებულ მსხვერპლს ვიხსენებთ, ჩვენი ვალია პატივი მივაგოთ ჩეჩენი და ინგუში ერების ტრაგედიასაც, - ამის შესახებ განცხადებას „ევროპული საქართველო“ ავრცელებს. პარტია ჩეჩენი და ინგუში ხალხის დეპორტაციის დღეს ეხმაურება. „1944 წლის 23 თებერვალს საბჭოთა კავშირმა საქართველოს მეზობელი ეს ერები საკუთარი განსახლების ისტორიული არეალიდან მთლიანად ცენტრალურ აზიაში გადაასახლა. სასტიკი დეპორტაციის პროცესში დაიღუპა ათასობით ადამიანი, მათ შორის ქალი და ბავშვი. ჩეჩენი და ინგუში ხალხის მასობრივი დეპორტაცია, რომელიც 2004 წელს ევროპის პარლამენტმა გენოციდად შეაფასა, საბჭოთა რეჟიმის მიერ ჩადენილ ერთ-ერთ ყველაზე სასტიკ დანაშაულად მიიჩნევა. ამ დღეებში, როცა ჩვენი ქვეყნის მიერ საბჭოთა ოკუპაციასთან ბრძოლაში გაღებულ მსხვერპლს ვიხსენებთ, ჩვენი ვალია პატივი მივაგოთ საქართველოს ისტორიულ ბედთან ძალიან ახლოს მდგომი ჩეჩენი და ინგუში ერების ტრაგედიასაც. საბჭოთა კომუნისტური რეჟიმისა და სტალინიზმის დანაშაულებრივი ბუნების ეს ერთ-ერთი ყველაზე მნიშვნელოვანი სიმბოლო არასდროს არ უნდა იქნას დავიწყებული“, - ნათქვამია პარტიის მიერ გავრცელებულ ინფორმაციაში.