ზვიად კუპრავას დაკავების შესახებ ინფორმაციას მივაწვდით სახალხო დამცველს, არასამთავრობო და დიპლომატიურ კორპუსს, - ამის შესახებ გაერთიანებული ოპოზიციის წევრმა თინა ბოკუჩავამ ბრიფინგზე განაცხადა.
გაერთიანებული ოპოზიციის წევრებმა თინა ბოკუჩავამ და მურთაზ ზოდელავამ „სამართალდამცველთა რეფორმირების ცენტრის“ ხელმძღვანელის ზვიად კუპრავას დაკავების საკითხზე პრესკონფერენცია გამართეს. მათი განცხადებით, ხელისუფლება ცდილობს ძალის გამოყენებით ჩაახშოს ოპოზიციური აზრი ქვეყანაში.
"დეტალურად გავაცნობთ ინფორმაციას არასამთავრობო ორგანიზაციებს, სახალხო დამცველს. არ შეიძლება ჭიდაობის ფედერაციის პრეზიდენტი, რომელმაც ჯაჭვით სცემა სპორტსმენს, გარეთ იყოს და ზვიად კუპრავა დააკავონ", - განაცხადა თინა ბოკუჩავამ.
მურთაზ ზოდელავას თქმით კი, ქვეყანაში არის ორმაგი სტანდარტები.
"ყველა ვადევნებთ თვალს გამოცხადებულ სიკვდილის ქრონიკას. ყველამ ვიცოდით, რომ ზვიად კუპრავას დასჯიდნენ მისი აქტიურობის გამო. მივმართავთ ყველას, თვალყური ადევნონ პროცესებს. ხელისუფლება ცდილობს გაანეიტრალოს ოპოზიცია. ჩვენ არ ვაპირებთ დანებებას. ადამიანს პატიმრობა შეუფარდეს და 48 საათი არ დაუკავებიათ. ორმაგი სტანდარტებია და ეს ნათლად ჩანს, როდესაც არჩეული მერი უჩა მამაცაშვილის ნათესავის მიერ არის ნაცემი და ამ ფაქტზე არ ჩატარებულა გამოძიება. როდესაც ასეთი ფაქტები ხდება და რეაგირება ნულია, ამის პარალელურად ოპოზიციის აქტივისტების განეიტრალება ხდება. ყველა რეალური ოპოზიციის წარმომადგენელი ბრძოლოს გაგრძელებას აპირებს", - განაცხადა მურთაზ ზოდელავამ.