გიორგი ქობულია იმედოვნებს, რომ „თიბისი ბანკის“ გარშემო განვითარებული მოვლენები ინვესტორებისა და ქვეყნის სასიკეთოდ დასრულდება

ეკონომიკის და მდგრადი განვითარების მინისტრი, გიორგი ქობულია იმედოვნებს, რომ „თიბისი ბანკის“ გარშემო განვითარებული მოვლენები ინვესტორებისა და ქვეყნის სასიკეთოდ დასრულდება.

„ჩემთვის, რა თქმა უნდა, გასაგებია, რომ „თიბისის“ საქმე და ამ თემაზე დღევანდელი ლაპარაკი არავის გვარგებს. ეს არ არის კარგი. იმედი მაქვს, რომ ეს ყველაფერი მშვიდობიანად და სასიკეთოდ დამთავრდება, როგორც ინვესტორებისთვის, ისე ჩვენთვის, როგორც ქვეყნისთვის“, - განაცხადა გიორგი ქობულიამ.

შეგახსენებთ, რომ საქართველოს გენერალურ პროკურატურაში „თიბისი ბანკთან“ დაკავშირებით გამოძიება უკანონო შემოსავლის ლეგალიზაციის ფაქტზე მიმდინარეობს. როგორც პროკურატურაში განმარტავენ, 2008 წლის აპრილ-მაისში, კომპანიებმა შპს „სამგორი M-მა“ და „სამგორი თრეიდმა“ „თიბისი ბანკისგან“ საბრუნავი სახსრების შევსების მიზნობრიობით დაახლოებით 17 მილიონი აშშ დოლარის ოდენობით სესხი აიღეს, რაც იმავე დღეს სესხის სახით გაცემული იქნა ფიზიკურ პირებზე - ბადრი ჯაფარიძესა და მამუკა ხაზარაძეზე. როგორც პროკურატურაში განმარტავენ, მთელ ამ პერიოდში საგულისხმოა ის ფაქტი, რომ არც „სამგორი M-სა“ და არც „სამგორი თრეიდის“ მიერ სესხის სახით აღებული თანხის გაღება არ მომხდარა, ხოლო მოგვიანებით მათი ჩანაცვლება მოხდა ოფშორში რეგისტრირებული კომპანიით და დღემდე ეს თანხა ანაზღაურებული არ არის „თიბისი ბანკისთვის“.