ხორავას ქუჩაზე მოზარდების მკვლელობის საქმეზე მსჯავრდებული არასრულწლოვნების, გ.ჯ.-სა და გ.ბ.-ს ბრალდების სისხლის სამართლის საქმეზე პროცესი თბილისის სააპელაციო სასამართლოში დღეს გაიმართება.
სხდომა 15:00 საათზეა დანიშნული, რომელიც მიხეილ კალანდიას ძმის, ლუკა კალანდიას დაკითხვით გაგრძელდება. აღნიშნული მოწმე გასულ სხდომაზე ბრალდების მხარემ დაკითხა, დღეს კი, კალანდიას კითხვებს დაცვის მხარე დაუსვამს.
შეგახსენებთ, რომ 2017 წლის 1 დეკემბერს, ხორავას ქუჩაზე ორი არასრულწლოვანი დაჭრეს. ერთი მოზარდი საავადმყოფოში მიყვანამდე გარდაიცვალა, მეორე კი, 2 დეკემბერს საავადმყოფოში დაიღუპა.
თბილისის საქალაქო სასამართლომ ლევან დადუნაშვილის განზრახ მკვლელობაში დამნაშავედ გ.ბ. სცნო, დავით სარალიძის მკვლელობის მცდელობისთვის კი, გ.ჯ. სასამართლოს ეს გადაწყვეტილება თბილისის სააპელაციო სასმართლოში ორივე მხარემ გაასაჩივრა.