„მცხეთის წყლის“, „რუსთავის წყლისა“ და შპს „თელავგაზის“ აბონენტის ცვლილება იუსტიციის სახლშია შესაძლებელი

„მცხეთის წყლის“, „რუსთავის წყლისა“ და შპს „თელავგაზის“ კომუნალური მომსახურების კომპანიებში აბონენტის რეგისტრაციის შეცვლა დღეიდან იუსტიციის სახლის 22 ფილიალშია შესაძლებელი. ამის შესახებ ინფორმაციას სემეკი ავრცელებს.

აღნიშნული სიახლე საქართველოს ენერგეტიკისა და წყალმომარაგების მარეგულირებელი ეროვნული კომისიისა (სემეკ) და იუსტიციის სახლის ერთობლივი პროექტის ფარგლებში განხორციელდა.

პროექტში, რომლის მიზანიცაა მოქალაქეებისთვის სწრაფი და გამარტივებული მომსახურებების შეთავაზება, ამჟამად 10 კომუნალური მომსახურების კომპანიაა ჩართული - „მცხეთის წყალი“, „რუსთავ წყალი“, „თელავგაზი“ „თელასი“, „ჯორჯიან უოთერ ენდ ფაუერი“, „ყაზტრანსგაზ-თბილისი“, „ენერგო-პრო ჯორჯია“, „გაერთიანებული წყალმომარაგების კომპანია“, „სოკარ ჯორჯია გაზი“ და „საქორგგაზი“.

სემეკის ინფორმაციით, მომხმარებელს შესაძლებლობა აქვს, იუსტიციის სახლში ერთი ვიზიტით, აბონენტის რეგისტრაციის ცვლილების მოთხოვნით ერთდროულად მიმართოს ელექტროენერგიის, ბუნებრივი გაზისა და წყალმომარაგების სექტორებში მომსახურე კომპანიებს. სერვისით სარგებლობა შეუძლიათ როგორც მუდმივ, ისე დროებით აბონენტებს. აბონენტად რეგისტრაციის ცვლილების განცხადების დაწერა მომხმარებელს შეუძლია უძრავ ქონებაზე საკუთრების უფლების რეგისტრაციისას. ასევე, განმცხადებელს იმავდროულად შეუძლია, გაიგოს უძრავ ქონებაზე არსებული დავალიანება.

აბონენტად შეცვლის მომსახურების მისაღებად იუსტიციის სახლში, 2018 წლის 21 ნოემბრიდან დღემდე, 4422 განცხადება დარეგისტრირდა.