ალექსი პეტრიაშვილი - არ გამოვრიცხავ, რომ რუსეთი საქართველოში მორიგ აგრესიულ სამხედრო კამპანიას გეგმავდეს

არ გამოვრიცხავ, რომ რუსეთი გეგმავდეს საქართველოში მორიგ აგრესიულ სამხედრო კამპანიას, - ამის შესახებ ევროპულ და ევროატლანტიკურ სტრუქტურებში ინტეგრაციის საკითხების ყოფილმა სახელმწიფო მინისტრმა ალექსი პეტრიაშვილმა „კვირის პალიტრისთვის“ მიცემულ ინტერვიუში განაცხადა.

პეტრიაშვილი გამოეხმაურა რუსეთის საგარეო საქმეთა მინისტრის მოადგილის, გრიგორი კარასინის განცხადებას და აღნიშნა, რომ მუქარა იკითხებოდა არა მხოლოდ კარასინის განცხადებაში, არამედ რუსეთის თავდაცვის მინისტრის სიტყვით გამოსვლაშიც საქართველოს გააქტიურების თაობაზე და მათ შესაძლო რეაგირებაზე.

„ეს არის კრემლის კლასიკური რიტორიკის გაგრძელება, ამიტომ დიდი სიფრთხილე მართებს ყველას, უპირველესად, ხელისუფლებას, მაგრამ ასევე საჭიროა საზოგადოების მაქსიმალური მობილიზებაც. რუსეთის პრეზიდენტის რეიტინგი ახლა ძალიან დაცემულია, და როგორც წესი, პუტინი ამის გამოსწორებას საგარეო ომებით ცდილობს. ბოლო დროს განიხილება უკრაინაზე ახალი სრულმასშტაბიანი შეტევა. ლაპარაკია ბელორუსის "გადაყლაპვაზეც". თუმცა არ გამოვრიცხავ, რომ რუსეთი გეგმავდეს საქართველოში მორიგ აგრესიულ სამხედრო კამპანიას. ეს შეიძლება უკავშირდებოდეს ანაკლიის პორტსაც. რუსმა სამხედრო მაღალჩინოსნებმა ამაზე უკვე არაერთხელ ილაპარაკეს, შიშობენ, რომ პორტში ნატო-ს წევრი ქვეყნების დიდი ავიამზიდები შემოვლენ და ა.შ.“, - განაცხადა პეტრიაშვილმა.

მისივე თქმით, კრემლს ძალიან არ მოსწონს, რომ საქართველო ინტესიურად ინტეგრირდება ნატო-სთან როგორც სამხედრო, ისე პოლიტიკური თვალსაზრისით, ამიტომ თადარიგი დაიჭირა.

„ასეთი ტიპის განცხადებები ძალიან გახშირდა. ლუგარის ლაბორატორიის საკითხიც ამას ემსახურებოდა. საქართველოს მუდმივად ტონუსში ამყოფებენ. ოფიციალური მოსკოვი ცდილობს უარი ვთქვათ წვრთნებზე, ნატო-ში ინტეგრაციაზე. მე კი ვფიქრობ, ჩრდილოატლანტიკურ ალიანსში რაც შეიძლება სწრაფად უნდა გავწევრდეთ. რაც მთავარია, ამას საზოგადოების სრული კონსოლიდაცია სჭირდება და არა შიდა დაპირისპირება“, - განაცხადა ალექსი პეტრიაშვილმა.

შეგახსენებთ, რომ გრიგორი კარასინმა „კომერსანტთან“ ინტერვიუში თქვა, რომ სამხრეთ კავკასიის რეგიონში ნატო-ს აქტიურობის გაზრდა, ადრე თუ გვიან გარკვეული პრობლემების მომტანი იქნება. მისი თქმით, თბილისმა უნდა აირჩიოს, რეგიონული კეთილგანწყობა ან ევროატლანტიკური კურსი.

ვლადიმერ ფესენკო - უკრაინის გარეშე უკრაინის მომავალზე შეთანხმების ნებისმიერი მცდელობები დამარცხებისთვისაა განწირული
დავით თვალაბეიშვილი - ჩვენ მხარს ვუჭერთ ევროკავშირის ენერგეტიკული გაერთიანების მედიაციის გაგრძელებას და მოვუწოდებთ მასში ჩართულ ყველა მონაწილეს, გამოვიყენოთ ეს შესაძლებლობა
ქართული პრესის მიმოხილვა 23.07.2021
თორნიკე შარაშენიძე - ხელისუფლების სერიოზული შეცდომა იყო ვაშინგტონისთვის არასწორი ინფორმაციის მიწოდებაში აშშ-ს ელჩის დადანაშაულება, შესაძლოა, ეს ამბავი მათ მომავალში ცუდადაც კი დაუბრუნდეთ
პირველად საქართველოში - დავით ტატიშვილის სამედიცინო ცენტრში უნიკალური ოპერაცია ჩატარდა
მინერალური წყალი „ბორჯომი“ ახალ კამპანიას იწყებს
„სინერჯი“ თევზის კომპანია „უმალის“ პარტნიორი გახდა
დავით ტატიშვილის სამედიცინო ცენტრმა ამჯერად ახალი ამბულატორიული ცენტრი აჭარის რეგიონში, ბათუმში გახსნა